Թեհրանում սպանվել է ՀԱՄԱՍ-ի քաղբյուրոյի ղեկավար Իսմայիլ Հանիեն

«Հրապարակը» գրում է. «Թեհրանում սպանվել է ՀԱՄԱՍ-ի քաղբյուրոյի ղեկավար Իսմայիլ Հանիեն:
Պաղեստինյան ՀԱՄԱՍ խմբավորումը հայտարարել է, որ Հանիեն սպանվել է Թեհրանում գտնվող իր նստավայրին իսրայելական հարձակման հետևանքով։

«Եղբայր, առաջնորդ, շարժման առաջնորդ Մուջահիդ Իսմայիլ Հանիեն սպանվել է Թեհրանում գտնվող իր շտաբի վրա սիոնիստների հարձակման հետևանքով այն բանից հետո, երբ նա մասնակցել է Իրանի նորընտիր նախագահի երդմնակալությանը», - ասված է ՀԱՄԱՍ-ի հայտարարության մեջ:

Խմբավորումը դեռ չի պարզաբանել, թե կոնկրետ ինչպես է հարվածը հասցվել, որի արդյունքում ՀԱՄԱՍ-ի առաջնորդը մահացել է։ Հանիայի մահվան մասին հայտնել է նաև Իրանի Իսլամական հեղափոխության պահապանների կորպուսը։

ԻՀՊԿ կայքում տեղադրված հաղորդագրության մեջ ասվում է, որ ՀԱՄԱՍ-ի առաջնորդի հետ սպանվել է նրա թիկնապահներից մեկը։

Ըստ իսրայելական Ynet-ի՝ Հանիեն սպանվել է գիշերվա 2-ին մոտ։

Սպանության նախօրեին Հանիան մասնակցել է Իրանի նորընտիր նախագահ Մասուդ Փեզեշքիանի երդմնակալության արարողությանը, պարզաբանում է Tasnim-ը։ ՀԱՄԱՍ-ի բարձրաստիճան պաշտոնյա Մուսա Աբու Մարզուկը Հանիեի սպանությունն անվանել է «վախկոտ արարք» և ասել, որ այն «անպատասխան չի մնա»:

Իսրայելը դեռ չի մեկնաբանել Հանիեի մահը։ Իսրայելական բանակը CNN-ին ասել է, որ «չի արձագանքում օտարերկրյա լրատվամիջոցների հաղորդագրություններին»: Իսրայելի պաշտպանության բանակը նույնպես դեռ պաշտոնական հայտարարություն չի արել։

Իսմայիլ Հանիեն, որը համարվում է 62 տարեկան, ղեկավարել է ՀԱՄԱՍ-ի քաղաքական գործողությունները որպես շարժման քաղբյուրոյի նախագահ և կենտրոնական դեր է խաղացել խմբավորման բանակցություններում, ներառյալ Իսրայելի հետ հրադադարի համաձայնագիրը: Հանիեն դարձել է ՀԱՄԱՍ-ի առաջնորդը 2006 թվականին՝ Գազայի հատվածում խմբավորման իշխանության գալուց հետո։ Հանիեն իսրայելական բանտերում պատիժ է կրել երկու անգամ՝ 1980-ականներին և 1990-ականներին:

Նա Թեհրան է ժամանել Իրանի նախագահի երդմնակալության արարողությանը։ Ըստ The New York Times-ի՝ սպանության նախօրեին Հանիեն հանդիպել է նաև Իրանի գերագույն առաջնորդ այաթոլլա Ալի Խամենեիի հետ։ Մայիսին Միջազգային քրեական դատարանի դատախազը ձերբակալության օրդեր է խնդրել ՀԱՄԱՍ-ի երեք առաջնորդների, այդ թվում՝ Հանիյեի նկատմամբ, որոնք պատասխանատու են 2023 թվականի հոկտեմբերի 7-ին Իսրայելի վրա հարձակման և հարյուրավոր իսրայելցիների սպանության համար»: