Տարօրինակ ձերբակալություն Երեւանի օդանավակայանում
Երեկ կեսգիշերին «Զվարթնոց» օդանավակայանում ձերբակալվել է Ռուսաստանի կողմից հետախուզվող ազգությամբ հայ ՌԴ քաղաքացի Կարեն Վարդանյանը։ 42-ամյա տղամարդը 2019-ին մասնակցել է Մոսկվայի կենտրոնում քաղաքական ընդդիմության կողմից կազմակերպված բողոքի ակցիային, ինչից հետո Ռուսաստանը քրեական գործ է հարուցել իր քաղաքացու նկատմամբ ու հետախուզում հայտարարել։ Վարդանյանը երեկ Թբիլիսիից Երևան է եկել՝ ըստ եղբոր, ով Հայաստան էր ժամանել նույն թռիչքով։
«Զվարթնոց» օդանավակայանից Վարդանյանին տեղափոխել էին ձերբակալվածների պահման վայր։ Այսպիսով կարելի է փաստել, որ Հայաստանի Հանրապետությունը ևս մեկ անգամ կատարում է ոչ իրավական պետության ապօրինի պահանջները, այն է՝ ձերբակալել և ձերբակալման մասին հայտնել Ռուսաստանի Դաշնությանը իր քաղաքացիների վերաբերյալ։ ՀՀ քրեական դատավարության օրենսգիրքը այս հիմքով ձերբակալման ընթացակարգ չի նախատեսում, այսինքն՝ երեք տեղի ունեցած ամբողջ գործընթացը ապօրինի է։
Ըստ Վարդանյանի եղբոր՝ Արմանի, Երևան ժամանելուն պես Կարենի անձնագրում մուտքի կնիք դրեցին... և անմիջապես հայտնեցին, որ ՌԴ-ում իր դեմ քրեական գործ է հարուցվել, ինչը նշանակում է, որ չի կարող օդանավակայանից ներս անցնել, այսինքն՝ մտնել Հայաստան։
Գլխավոր դատախազությունից չպատասխանեցին մեր հարցերին, թե ինչ հիմքով է երեկ «Զվարթնոցում» ձերբակալվել ՌԴ քաղաքացին, ու արդոք ռուս իրավապահներն իրենց դիմել են նրան արտահանձնելու պահանջով, հորդորեցին հարցերը գրավոր ուղարկել։
Zham.am