Հայկական կինոթանգարանը կդառնա լավագույն թանգարաններից մեկը (Լուսանկանրներ)

Դեկտեմբերի 14-ին Հայաստանի կինեմատոգրաֆիստների միությունում կայացավ հայկական կինոթանգարանի առաջին խորհրդանշական նմուշների հանձնման արարողությանը նվիրված մամուլի ասուլիս: Ներկայացվեցին հայկական կինոյում օգտագործված բացառիկ իրեր, հայկական լեգենդար կինոֆիլմերի ստեղծմանը «մասնակցած» կինոնկարահանող տեխնիկա, արխիվային եզակի նմուշներ եւ այլն:

«Հուզիչ է, որ մեր կինոյի շատ կարևոր մասունքներ հավաքվելու են մեկ հարկի տակ: Կինոթանգարանը չի լինի մեռած, այլ՝ կենդանի, որտեղ ֆիլմեր կվերականգնվեն, դասախոսություններ կլինեն, ֆիլմեր դիտելու համար ևս կհատկացվի փոքրիկ դահլիճ: Դրա շնորհիվ մենք կշարունակենք մեր երազանքը՝ հայկական կինոն մարդկանց հասցնելու»,-ասաց Կինեմատոգրաֆիստների միության նախագահ Հարություն Խաչատրյանն ու հավելեց՝ աշխատանքները կտևեն մեկ-երկու տարի:

Նրա խոսքով՝ ՀՀ մշակույթի նախարար Արմեն Ամիրյանը ևս մեծ ոգևորությամբ է ընդունել կինոթանգարան ստեղծելու գաղափարը:

Մշակույթի նախարար Արմեն Ամիրյանի խոսքերով, կինոյի մահանալու մասին լուրերը խիստ չափազանցված են. «Երբ մենք հավաքում ենք կինոյի ժառանգությունը, սրանով ապահովում ենք կինոյի շարունակականությունը, ապագան: Ես շատ ուրախ եմ, որ այս թանգարանի ստեղծման գաղափարը միավորել է բոլորիս: Նախարարության եւ կինոմիության համատեղ ուժերով կարող ենք միասնաբար իրականություն դարձնել կենդանի թանգարանի ստեղծման գաղափարը, որտեղ կինոգործիչները կարող են հանդիպել, խոսել իրենց ապագա ծրագրերից, հյուրեր ընդունել, փառատոներ կազմակերպել, ոգեւորել երիտասարդներին: Վստահ եմ, որ սա դառնալու է ամենահաճախելի թանգարաններից մեկը»:

Zham.am