Իմ երեխաները կտրված են հորից, բայց ես բանտում եմ, ոչ թե գերեզմանոցում` պատերազմի հետևանքով. Աշոտյան

ՀՀԿ փոխնախագահ, քաղբանտարկյալ Արմեն Աշոտյանը Հակակոռուպցիոն դատարանում դատական նիստի ժամանակ հայտարարեց, որ իր պայքան ու դրան հետևած կալանքը երբեք անձնական չի դիտարկում։

«Այս 400 օրը, ինչ գտնվում եմ կալանքի մեջ, ոչ թե իմ անձնական կալանքի օրերն են, այլ՝ Արցախի կորստի,  Արցախի հայաթափման, Տավուշի 4 գյուղեր Ադրբեջանին կցելու, նոր զոհերի, սեփական ժողովորդի դեմ ուժ կիրառելու և այլն։ Երկիրն ապրում է այլ կարևոր երևույթներով։

Բոլոր դժվարություններով հանդերձ  իմ և իմ ընտանիքի անձնական պատմություններն իրականում խամրում են այն ամենի համեմատ, ինչ տեղի է ունեցել և տեղի է ունենում մեր երկրում։

Ես գոնե հայկական բանտում եմ նստած, Արցախի ղեկավարությունը՝ ադրբեջանական բանտում։ Իմ պատմությունը նրանց մոտ խամրում է։ Իմ երեխաները  կտրված են հորից,  բայց ես  բանտում եմ, ոչ թե գերեզմանոցում` պատերազմի հետևանքով։ Ես կտրված եմ տնից, բայց, փառք Աստծո, տուն ունեմ և այնտեղ ուրիշ մարդ չի բնակվում։

Որքան էլ դժվար է իմ ու իմ ընտանիքի համար, այս ամենը խամրում է ողբերգական խնդիրներ ունեցող  հարյուր հազարավոր իմ հայրենակիցների կողքին»,-ասաց Աշոտյանը։
Աղբյուր` Panorama.am