Գլխավոր «գորշ գայլ» Էրդողանը կատաղել է ՈՒԵՖԱ-ի չափազանց մեղմ որոշումից

Պաշտոնապես հաստատվեց, որ ՈւԵՖԱ-ն որոշել է կարգապահական տույժի ենթարկել Թուրքիայի հավաքականի ֆուտբոլիստ Մերիխ Դեմիրալին: Նա, հիշեցնենք, ԵՎՐՈ-2024-ի 1/8-րդ եզրափակիչ փուլի Ավստրիայի դեմ խաղում խփած գոլը «նշել» է համապատասխան ժեստով ցույց տալով թուրքական ծայրահեղ-ազգայնական հանցավոր ու ահաբեկչական «Գորշ գայլեր» կազմակերպության «խորհրդանշը» (մատների ագուցմամբ ստացվող գայլի գլխի պատկեր): 
Այդ ֆաշիստական դրսևորումը, բնականաբար, աննկատ ու անարձագանք չի մնացել: Հանրագումարում, ՈՒԵՖԱ-ն 2 խաղով որակազրկել է Թուրքիայի հավաքականի պաշտպան Դեմիրալին: 
Պետք է նկատել, որ ՈՒԵՖԱ-ն դեռ բավականին մեղմ է վարվել: Հաշվի առնելով, թե հատկապես ինչ է իրենից ներկայացնում «Գորշ գայլեր» ահաբեկչական կազմակերպությունը, կարելի էր ակնկալել և շատ ավելի խիմտ պատիժ: Նույնիսկ դժվար է պատկերացնել, թե ինչ կկատարվեր որևէ ֆուտբոլիստի ու նրա ներկայացրած հավաքականի հետ, եթե գոլից կամ հաղթանակից հետո, մանավանդ՝ Գերմանիայում, ցուցադրեին ՝ֆաշիստական հանրահայտ ժեստը: 
Իսկ Թուրքիայի ներկայացուցչի նկատմամբ, ընդամենը 2 խաղով որակազրկման չափ ներողամիտ են գտնվել: 

Փոխարենը, բառի բուն իմաստով կատաղել է Նիկոլ Փաշինյանի սիրելի գործընկերը՝ Թուրքիայի նախագահ Ռեջեփ Էրդողանը: 
Ինչպես հաղորդում է Panorama.am-ը, Թուրքիայի գլխավոր «գորշ գայլ» Էրդողանն անդրադարձել է  Դեմիրալի որակազրկմանը, հայտարարել. «Որևէ մեկն ասո՞ւմ է, որ գերմանացիների մարզաշապիկներին արծիվներ կան, որևէ մեկն ասո՞ւմ է, որ ֆրանսիացիների մարզաշապիկներին աքաղաղ կա։ Մերիխը (Դեմիրալը) ցույց տվեց իր հուզմունքն այս ժեստով: Դրանից հետո մեր արտաքին գործերի նախարարությունը կանչել է Գերմանիայի պաշտոնական ներկայացուցիչների և ներկայումս ձեռնարկվում են անհրաժեշտ քայլեր։ Ամեն ինչ կորոշվի շաբաթ օրը։
Հաղթանակով հեռանանք խաղադաշտից և անցնենք հաջորդ փուլ։ Եթե ոչ մի արտառոց բան տեղի չունենա, ես ներկա կլինեմ հանդիպմանը»,- rsport.ria.ru-ի հաղորդմամբ, Աստանայից վերադառնալիս, ինքնաթիռում լրագրողներին ասել է Էրդողանը։
Նա, բնականաբար, թրքություն է արել, քանի որ Դեմիրալն, օրինակ, թուրքական դրոշի վրա եղած կիսալուսին կամ աստղ չի ցուցադրել, այլ շատ կոնկրետ, ահաբեկչական, իր էությամբ՝ ֆաշիստական կազմակերպության խորհրդանիշ: Այն ցուցադրելն, ի դեպ, արգելված է Ավստրիայում, որի նկատմամբ թուրքերը ֆուտբոլի դաշտում հաղթանակի հասան: Դա նաև այդ առումով էր ցինիկ ու ոչ սպորտային պահվածք: 
Իսկ Էրդողանը երևի պետք է հայտարարեր, որ իրենք բոլորը «գորշ գայլեր» են: Չնայած, դա այդպես էլ կա: Թուրքիան եղել է ու մշտապես լինելու է մարդատյաց, հանցագործ, արնախում պետություն: