Մոսկվան և Թեհրանը կրկին նախազգուշացրեցին Փաշինյանին. ի՞նչ հետևանքներ կարող են լինել Հայաստանի համար

Իրանի արտաքին գործերի նախարարի պաշտոնակատար Ալի Բաղերի Կանին և Ադրբեջանի ու Հայաստանի միջև հարաբերությունների կարգավորման հարցերով ՌԴ ԱԳՆ հատուկ ներկայացուցիչ Իգոր Խովաևը Թեհրանում քննարկել են իրավիճակը Հարավային Կովկասում՝ դեմ արտահայտվելով տարածաշրջանի գործերում արտաքին «խաղացողների» միջամտությանը:

«ՌԴ ԱԳ նախարարի հատուկ ներկայացուցիչ Իգոր Խովաևի հետ հանդիպմանը ես բացատրեցի Իրանի դիրքորոշումը տարածաշրջանի խնդիրների վերաբերյալ՝ նշելով Կովկասում որոշ արտատարածաշրջանային խաղացողների առկայության ապակայունացնող հետևանքները», - ասել է Իրանի ԱԳՆ-ի ղեկավարը։  «Կովկասում խաղաղություն և կայունություն պահպանելու, Իրանի, Ռուսաստանի և տարածաշրջանային այլ կառավարությունների միջև ավելի սերտ համակարգում և փոխգործակցություն է  անհրաժեշտ»,- նշել է նա:

Խովաևն ընդգծել է Մոսկվայի և Թեհրանի տեսակետների նմանությունը Հարավային Կովկասի խնդիրների վերաբերյալ և «այս առումով նշել է երկու երկրների իշխանությունների միջև սերտ և մշտական ​​փոխգործակցության և համակարգման անհրաժեշտությունը՝ պայքարելու արտատարածաշրջանային խաղացողների միջամտության դեմ»  Հարավային Կովկասի հարցերում, ասվում է Իրանի ԱԳՆ հայտարարության մեջ։

Իրանի և Ռուսաստանի ներկայացուցիչների այս հատուկ հայտարարությունը, ըստ ռուս և իրանական փորձագետների, ուղղված է եղել առաջին հերթին՝ Հայաստանին, որը սեպարատ կարգով փորձում է տարածաշրջանում ակտիվ դերակատարություն տալ ԱՄՆ-ին, ով գրեթե սառը պատերազմի մեջ է գնտվում, թե՛ Իրանի, և թե՛ Ռուսաստանի հետ:

Ի դեպ, Ադրբեջանը ակտիվորեն փորձում է լավացնել իր հարաբերությունները Իրանի հետ, ինչի վկայությունն էին վերջերս անցկացված  համատեղ զորավարժությունները:

Իսկ Ռուսաստանը Ադրբեջանի հետ իր հարաբերությունները բարձրացրել է գրեթե ռազմավարական մակարդակի:

Այս ֆոնին Փաշինյանի միտումնավոր քաղաքականությունը՝ վատացնել հարաբերությունները Մոսկվայի հետ, գրեթե իդեալական միջավայր է ստեղծում Ադրբեջանի կողմից Զանգեզուրի միջանցքը գրավելու համար:

Այդ տեսանկյունից   պաշտոնական Բաքուն ուշի-ուշով հետևում է, թե ինչպես է փոփոխվում Մոսկվայի և Թեհրանի վերաբերմունքը Հայաստանի նկատմամբ:

Եթե Փաշինյանը անցնի այդ «կարմիր գիծը», ապա անխուսափելի կլինի Ադրբեջանի կողմից Զանգեզուրի միջանցքի գրավումը, որը կբերի Հայաստանի պետականության կազմաքանդման:

Ինչո՞ւ է Փաշինյանը  վարում այսպիսի քաղաքականություն, կա՞ արդյոք այս ամենի մեջ միտում, դա արդեն այլ խոսակցության թեմա է:

Սա է իրականությունը:

Արտակ Հակոբյան
Zham.am