Երկրում առկա ճգնաժամի միակ հանգուցալուծումը Նիկոլ Փաշինյանի հրաժարականն է, խաղաղ ճանապարհով նրա հեռացումը

ՀՅԴ Հայաստանի Գերագույն մարմնի հայտարարությունը. «Հունիսի 12-ի երեկոյան ՀՀ ոստիկանությունը Երևան քաղաքի Բաղրամյան և Դեմիրճյան փողոցների հատման հատվածում, առանց օրինական հիմքերի, հատուկ միջոցների կիրառմամբ բիրտ և ոչ համաչափ ուժ գործադրեց խաղաղ ցուցարարների վրա:

ՀՅԴ Հայաստանի Գերագույն մարմինը խստորեն դատապարտում է ոստիկանության հակաօրինական գործողությունները, քաղաքական մեծամասնության՝ բռնաճնշումներն արդարացնող և դրանք խթանող դիրքավորումը։

Կատարվածը ևս մեկ անգամ փաստում է, որ գործող իշխանությունը չունի հանրային նվազագույն լեգիտիմություն։

Հայաստանի պետականության, Հայրենիքի ու արժանապատվության այս համաժողովրդական պայքարն անկասելի է, իսկ ՀՀ քաղաքացին իրավունք ունի իրացնելու իր սահմանադրական իրավունքները։

Երկրում առկա ճգնաժամի միակ հանգուցալուծումը Նիկոլ Փաշինյանի հրաժարականն է, խաղաղ ճանապարհով նրա հեռացումը»։

ՀՅԴ Հայաստանի Գերագույն մարմին

13 հունիսի, 2024 թ․