«Մարդու իրավունքների պաշտպանը չի հասկանում իր առաքելությունը և հլու-հնազանդ կատարում է իշխանությունների կարճատես հրամանները». Լարիսա Ալավերդյան

Այսօր «Տավուշը հանուն հայրենիքի» շարժումը՝ Բագրատ արքեպիսկոպոս Գալստանյանի առաջնորդությամբ, գնացել էր Մարդու իրավունքների պաշտպանի գրասենյակի մոտ՝ ՄԻՊ Անահիտ Մանասյանից ստանալու որոշ հարցերի պատասխաններ՝ արդյո՞ք ՄԻՊ-ը ծառայում է ՀՀ քաղաքացիների իրավունքների պաշտպանությանը, հատկապես, որ վերջին շրջանում ոստիկանությունը բիրտ ուժ գործադրելով՝ բերման է ենթարկում շարժման մասնակիցներին։

ՄԻՊ Անահիտ Մանասյանն առաջարկել էր ընդունել ակցիայի մասնակից 4 քաղաքացիների Բագրատ սրբազանի հետ՝ առանց լրատվամիջոցների ներկայացուցիչների։ Սակայն Բագրատ սրբազանն ասել էր, որ հանդիպմանը կգնա միայն լրատվամիջոցների ներկայացուցիչների հետ։ Մոտավորապես 4 ժամ ՄԻՊ գրասենյակի մոտ մնալուց հետո, Բագրատ սրբազանին այդպես էլ Անահիտ Մանասյանը չընդունեց, որից հետո ակցիայի մասնակիցները վերադարձան Սուրբ Աննա եկեղեցու մոտ, որտեղ Բագրատ սրբազանը հայտարարեց, որ վաղը մեկնելու են Վարդենիս՝ Սոթքում հանրահավաք անցկացնելու նպատակով։

168.am-ի հետ զրույցում ՀՀ առաջին ՄԻՊ, իրավապաշտպան Լարիսա Ալավերդյանն անդրադառնալով ՄԻՊ գրասենյակի մոտ Բագրատ սրբազանի ակցիային և ՄԻՊ Անահիտ Մանասյանի՝ ակցիայի մասնակիցների առջև դրված պահանջներին և, ի վերջո, նրանց չընդունելուն, նկատեց.

«Ցավում եմ Անահիտ Մանասյանի համար, կարծում եմ՝ նա իր նշանակումն այդպես մինչև վերջ չի ընկալում՝ որպես առաքելություն։

ՄԻՊ գրասենյակն առանձնահատուկ հաստատություն է, և այս առումով ես միշտ ասում եմ՝ մեծ պատիվ է ինձ համար, որ եղել եմ առաջին ՄԻՊ-ը, դա իսկապես հնարավորություն է իրականացնելու առանձնահատուկ գործունեություն, որ ոչ այդքան աշխատանք է, որքան առաքելություն։

Անահիտ Մանասյանն իրավունք չուներ չընդունել Բագրատ սրբազանին։ Անգամ այն պահանջը, որ առաջ է քաշվել՝ հանդիպումն անցկացնել առանց լրագրողների, առավել քան զարմանալի է, որ ՄԻՊ-ը հրաժարվում է լրատվամիջոցների ներկայացուցիչների մասնակցությունից։ Սա աննախադեպ մի բան է, եթե դա աներ ինչ-որ պետական հաստատություն, օրինակ՝ ԱԱԾ-ն, ինչ-որ տեղ հասկանալի կլիներ, թեկուզ ճիշտ չեմ համարում, բայց ՄԻՊ-ի դեպքում անհասկանալի է»,- նշեց Լարիսա Ալավերդյանը։

Լարիսա Ալավերդյանի մեկնաբանությամբ՝ ՄԻՊ-ը չունի որևէ խնդիր, որը կարող է ծածուկ լինել, հետևաբար՝ լրատվամիջոցների ներկայությունը մերժելը դատապարտելի է։

«Ինքս նաև դատապարտում են այն անմարդկային ու վերին աստիճանի մեծ ուժի կիրառումը, որը ցուցադրում է ոստիկանությունը բողոքի ակցիայի մասնակիցների նկատմամբ։ Հետևաբար, կարծում եմ՝ այստեղ ՄԻՊ-ը կարող է մեծ դերակատարում ունենալ, որպեսզի ոչ թե զայրույթի ալիք բարձրանար, այլ իր պարտականությունների և լիազորությունների սահմաններում կարողանար այդ ամենին վերջ դնել։ Ոստիկանությունը կորցնում է իր մարդկային դեմքը, պետք է ոստիկանությանը պաշտպանել հենց ոստիկանության գործողություններից, որի հետևանքով կորցնում են մարդկային կերպարանքը»,- նշեց Լարիսա Ալավերդյանը։

Նրա բնորոշմամբ՝ ճիշտ երկրում ցանկացած ՄԻՊ կգործեր իր լիազորությունների ու պարտականությունների սահմաններում, եթե լսեր, տեսներ տեղի ունեցողը, միջամտեր և դրանով իսկ «ծառայություն» մատուցեր օրվա իշխանություններին։

«Բագրատ սրբազանի դիմելը ՄԻՊ-ին՝ ունեցել է առանձնահատկություն, որ հանդիպումը կայանա լրատվամիջոցների ներկայացուցիչների ներկայությամբ։ Կրկնում եմ՝ լրագրողների ներկայությունը կզարդարեր ՄԻՊ-ին ու նրա առաքելությունը, քանի որ դա տեղի չի ունեցել, մնում է ամենապրիմիտիվ վարկածը, որ Մարդու իրավունքների պաշտպանը չի հասկանում իր առաքելությունը, տեղը և հլու-հնազանդ կատարում է իշխանությունների կարճատես հրամանները»,- եզրափակեց Լարիսա Ալավերդյանը։