Բյուրականի Հովհաննես Թումանյանի անվան դպրոցում դասադուլ է և գործադուլ. փաշինյանական իշխանությունն ուզում է հեռացնել տնօրենին

Բյուրականի միջնակարգ դպրոցում լարված վիճակ է, ընդդիմադիր հայացքների համար տնօրենին ազատում են աշխատանքից։ Այդ մասին MediaHub-ին ահազանգել է դպրոցի ուսուցիչներից մեկը։
Նրա խոսքով՝ տնօրենի «գլխին սարքում են», որպեսզի ազատվեն նրանից։
«Հարցն այն է, որ անիմաստ նկատողություններ են տվել տնօրենին, որ ազատեն աշխատանքից։ Առաջին նկատողությունը եղել էր հունվար ամսին, երբ Բյուրականում լույս չկար, ու մենք երեխաներին տուն ենք ուղարկել, քանի որ ցուրտ էր։ Մարզպետարանից այդ օրը եկել ու արձանագրել էին, որ դպրոցում մարդ չկա։ Երկրորդ դեպքը օրերս է եղել, երբ ժամը 16:40-ին եկել են, արձանագրել, որ տնօրենը դպրոցում չէ։ Նա բացատրագիր է ներկայացրել, որ այդ ժամին տնայց է կատարել դպրոցում սովորող հատուկ կարիքներ ունեցող երեխաներից մեկին։ Բայց դե այդ բացատրագիրը չեն ընդունել ու նկատողություն են տվել։ Ասում են, թե տնօրենն այդ ժամին մասնակցել է Սրբազանի կողմից իրականացվող անհնազանդության ակցիային»,- պատմել է նա։
Այս պահին Բյուրականի միջնակարգ դպրոցում լարված վիճակ է, աշակերտները դասադուլ են անում, իսկ ուսուցիչները՝ գործադուլ։
«Ոստիկանները եկել ու լցվել են դպրոց»,- պատմել է MediaHub-ի զրուցակիցը։
Իսկ ահա shamshyan.com-ը հաղորդում է. 
«Այսօր՝ մայիսի 16-ին, լարված իրավիճակ է ստեղծվել Արագածոտնի մարզում: Բյուրականի Հովհաննես Թումանյանի անվան միջնակարգ դպրոցի բակում են հավաքվել դպրոցի ուսուցչական ամբողջ կոլեկտիվը, դպրոցում սովորող մոտ 500-ից ավելի երեխաներ,  նրանց ծնողները, ովքեր արդարացիորեն պահանջում են, որ Արագածոտնի մարզպետը անհիմն որոշում է ընդունել դպրոցի տնօրեն Մկրտչյանին ազատել պաշտոնից:
Ֆոտոլրագրողի հետ զրույցում ակցիայի մասնակիցներից մեկն ասում էր.
«7 տարի է` այս դպրոցը ղեկավարում է տիկին Մկրտչյանը, ու այս տարիների ընթացքում դպրոցը միշտ ծաղկել, վերելք է ապրել: Դպրոցը այդ 7 տարվա ընթացքում ոչ մի խնդիր չի ունեցել: Մենք թե՛ տնօրենից, թե ուսուցչական կոլեկտիվից շատ գոհ ենք: Պահանջում ենք, որպեսզի մարզպետը տնօրենին ազատելու իր որոշումը չեղյալ հայտարարի, քանի որ այդ որոշմամբ նա խաթարում է մի ամբողջ գյուղի, դպրոցի անդորրը:
Ու հիմա ստացվում է, որ տնօրենը, որ ձեռնարկել է քանդված մասնաշենքի մի հատվածի կապիտալ վերանոորոգում ու այդ ամենը արել է իր միջոցներով, դուր չի եկել մարզպետարանի այդ «վայ չինովնիկներին»:
Երևի թե ուզում են ՔՊ-ից ինչ որ մեկին բերեն ու նստեցնեն դպրոցի տնօրեն: Դա օգուտ չի տա, այս հսկայական կոլեկտիվը չի հանդուրժի, ու ոչ միայն կոմեկտիվը, նաև գյուղը. այստեղ սովորող մեր երեխաներին չենք թողնի հաճախեն այս դպրոց:
Հիմա այս պահին դպրոցի բակում մենք սկսել ենք ստորագրահավաք, և այն ներկայացնելու ենք Արագածոտնի մարզպետին, եթե հետևություններ չարեց և չեղյալ չհայտարարեց իր կողմից անհիմն հրամանը, ապա դիմելու ենք ավելի կտրուկ միջոցների:
Այս պահին դպրոցում դասադուլը շարունակվում է:
Ու հիմա մարզպետի կողմից մեր երեխաներին պարտադրում են, որպեսզի դասադուլներ անեն, չմասնակցեն դասապրոցեսին  ու դրա թիվ մեկ պատասխանատուն մարզպետն է, այնպես որ էս լավ կոլեկտիվը, որ 7 տարի է՝ ծաղկում է, 7 տարի է՝ բարգավաճում է, անհիմն հրամանի պատճառով փորձում են խաթարել: Դպրոց, որը նաև հերոսներ է տվել, այդ թվում՝ Արցախյան մի քանի պատերազմների»:
Ֆոտոլրագրողը հայտնում է նաև, որ երբ ծնողները իմացել են, որ դպրոցի տնօրինությունը բարեկարգում է դպրոցի անբարեկարգ 7-րդ կորպուսը, անգամ ինքնակամ մասնակցում են այդ աշխատանքներին, նրանք օգնում են շինարարներին, ու հիմա ասում են, որ ցավ են ապրում, որ մարզպետարանը դպրոցի կոլեկտիվին խրախուսելու փոխարեն անհեթեթ պատճառաբանություններով ազատում է տնօրենին. այստեղ են ասում ՝ մարզպետի որոշումն այնքան անհեթեթ է, որ եփած  հավի ծիծաղը կգա:
Ժամանել են ՀՀ Ներքին գործերի նախարարության ոստիկանության Աշտարակի բաժնի անչափահասների գործերով բաժանմունքի ծառայողները՝ բաժնի պետ Սերգեյ Մարտիրոսյանի, անչափահասնցերի գործերով բաժանմունքի պետ Հարություն Գևորգյանի գլխավորությամբ, իսկ դպրոցի  ներսում կոլեկտիվի հետ զրույց է անցկացնում բաժնի պետի օպերատիվ գծով տեղակալ Հուսիկ Հովհաննիսյանը:
Տեղում են նաև ոստիկանության Պարեկային ծառայության Արագածոտնի մարզի գումարտակի պարեկները՝ գումարտակի հրամանատար Մհեր Մելքոնյանի գլխավորությամբ, սակայն բողոքի ակցիան կրում է խաղաղ բնույթ ու կարելի է ասել ամբողջ գյուղը մեկ մարդու նման միացել է դպրոցի աշխատակազմին և պահանջում են, որ մարզպետը ժամանի դպրոց: