«Մեզ մոտ հավաքված են Հայաստանի շահերն անձնականից վեր դասող մարդիկ». Էլինար Վարդանյան

Hraparak.am–ի հարցազրույցը «Համախմբում» կուսակցության փոխնախագահ, ԱԺ պատգամավոր Էլինար Վարդանյանի հետ:

-Տիկին Վարդանյան, երեկ հայտարարվեց, որ «Համախմբում», «Երրորդ հանրապետություն» եւ Հայաստանի դեմոկրատական կուսակցություններն առաջիկա խորհրդարանական ընտրություններին մասնակցելու են դաշինքով։ Ի՞նչ սկզբունքով է ձեւավորվել դաշինքը, այդքան գաղափարական տարբերություններ ունեցող մարդիկ եւ ուժեր ինչպե՞ս կարող են հայտնվել մի դաշինքի մեջ, Վարդան Օսկանյանն արեւմտամետ արժեհամակարգի հետեւորդ է, Արամ Սարգսյանը՝ հայտնի ռուսամետ եւ այլն։

«Համախմբումը», վստահ եմ՝ նաեւ «Երրորդ հանրապետություն» եւ Հայաստանի դեմոկրատական կուսակցությունները ոչ թե արեւմտամետ կամ ռուսամետ, այլ հայաստանակենտրոն, հայաստանամետ ուժեր են: Ինչ վերաբերում է այս կամ այն հարցում տարբերվող մոտեցումներ ունենալուն, ապա մենք մեր ջանքերը մեկտեղել ենք Հայաստանի առջեւ ծառացած խնդիրները միասնական ջանքերով լուծելու համար եւ մի կողմ ենք դրել երկրորդական տարաձայնությունները: Այս պահին կարեւորը Հայաստանն այս իրավիճակից դուրս բերելն է, եւ մենք շարունակում ենք խորհրդակցություններն այլ ուժերի, անհատների, հասարակական կազմակերպությունների հետ՝ դաշինքն ընդլայնելու համար:

-Այդ դեպքում ի՞նչ պլատֆորմի վրա է կառուցվելու ձեր նախընտրական քարոզչությունը, դաշինքը, օրինակ, ի՞նչ է ասելու իր ընտրողներին՝ դեպի Արեւմո՞ւտք է տանում երկիրը, թե՞ Ռուսաստան։

Կրկնում եմ՝ մենք մեր երկիրը տանելու ենք դեպի ժողովրդավարական Հայաստան, որտեղ օրենքի առաջ հավասար կլինեն բոլորը, անկախ դիրքից, պաշտոնից եւ սոցիալական վիճակից: Մեր ժողովուրդն արժանի է, որ ապրի արժանապատիվ կյանքով, ունենա արժանապատիվ աշխատանք եւ արժանապատիվ եկամուտ:

-Այդքան ամբիցիաներ ունեցող մարդ է հավաքվել դաշինքում, ցուցակի ձեւավորումն ինչպե՞ս է լինելու, որպեսզի դեռ չկազմավորված միավորումը չքանդվի։ «Ելք» դաշինքը, օրինակ, փակ-գաղտնի քվեարկության միջոցով ձեւավորեց իր ցուցակը, հնարավո՞ր է, որ դուք էլ նույն սկզբունքով ձեւավորեք, թե՞ ավանդական մեխանիզմն է գործելու, ասենք՝ մեկ-երկու հոգի նստելու են եւ կազմեն ցուցակը։

Հավատացեք՝ ցուցակները մեզ մոտ ամենավերջին հարցն են: Դեռ այդ մասին չենք էլ խոսել եւ չենք էլ որոշել, թե ցուցակն ինչ սկզբունքով է ձեւավորվելու: Մեզ մոտ հավաքված են ոչ թե ամբիցիոզ, այլ Հայաստանի շահերն անձնականից վեր դասող մարդիկ: Հիմա մենք ոչ թե ցուցակների մասին քննարկումներ ենք անում, այլ աշխատում ենք այն ծրագրի վրա, որը ներկայացնելու ենք մեր ժողովրդին, եւ դա լինելու է այնպիսի ծրագիր, որը կոնկրետ եւ պարզ քայլերով երկիրը դուրս կբերի այս վիճակից:

-Ո՞վ է լինելու դաշինքի վարչապետի թեկնածուն։

Դեռ շատ վաղ է այդ մասին խոսել: Այդ հարցին մենք կանդրադառնանք, երբ ձեւավորվելիս լինի համամասնական ընտրացուցակը:

-Քաղաքականություն վերադարձի մասին հայտարարեց նաեւ Գագիկ Ծառուկյանը՝ նշելով, որ լայն դաշինքով է մասնակցելու ընտրություններին, մամուլում գրվեց, որ հնարավոր է ձեր երկու դաշինքները միավորվեն։ Հնարավո՞ր եք համարում, եղե՞լ են քննարկումներ։

Մենք մեր կուսակցության ստեղծման պահից շեշտել ենք, հայտարարել, որ բաց ենք համագործակցության եւ դաշինքների համար: Մենք պարբերաբար շեշտել ենք, որ բացի ՀՀԿ-ից ցանկացած այլ ուժի հետ պատրաստ ենք համագործակցության: Առայժմ՝ այսքանը:

Մանրամասները՝ Hraparak.am–ում։