Ոստիկանությունը յուրովի «միացավ» հայ ժողովրդին ու որոշեց իր նախաձեռնությամբ «փակել» Օպերայի տարածքը

Փաշինյանական ՆԳՆ ոստիկանությունը մի հայտարարություն է տարածել, որը հատկանշական ու ծիծաղելի է միաժամանակ: Նախ, հայտարարությունը.
«ՀՀ ֆինանսների նախարարությունից ստացված հայտի հիման վրա՝ Ալ․ Սպենդիարյանի անվան օպերայի և բալետի ազգային ակադեմիական թատրոնում կայանալիք EBRD միջազգային ֆորումի շրջանակներում կազմակերպված միջոցառման առնչությամբ հասարակական կարգն ու անվտանգությունն ապահովելու նպատակով՝ մայիսի 15-ին, ժամը 15.00-ից 20.00-ն Օպերայի և բալետի ազգային ակադեմիական թատրոնի հարակից փողոցներում սահմանափակվելու են երթևեկությունն ու քաղաքացիների տեղաշարժը։
Մասնավորապես փակ կլինի Տերյան փողոցը՝ Սայաթ-Նովայի պողոտա-Տերյան փողոց խաչմերուկից մինչև Տերյան-Թումանյան փողոցների խաչմերուկ, Թումանյան փողոցը՝ Թումանյան-Աբովյան փողոցների խաչմերուկից մինչև Մաշտոցի պողոտա-Թումանյան փողոց խաչմերուկ։
Պատճառվող անհարմարությունների համար հայցում ենք քաղաքացիների ներողամտությունը և խնդրում այդ ժամերին շրջանցել մայրաքաղաքի նշված հատվածները»։
Հիշեցնենք, որ նախօրեին «Տավուշը՝ հանուն Հայրենիքի» շարժումը գլխավորող Տավուշի թեմի առաջնորդ Բագրատ արքեպիսկոպոս Գալստանյանը հայտարարել էր, որ հիշել միջոցոռմանը Փաշինյանի մասնակցության կապակցությամբ նախաձեռնում են լբողոքի ակցիա՝ ժամը 17-ին:
Ստացվում է, որ ոստիկանությունը, հասկանալով, թե ինչ է կատարվելու, այսպես ասած՝ «նախաձեռնություն է ցուցաբերել», ձևացնելու համար, թե՝ ամեն ինչ այդպես էլ նախատեսված էր: 
Այդ «թեզը» չի դիմանում որևէ քննադատության, քանի որ նման «միջոցառումների» դեպքում, որպես կանոն, ոստիկանությունը, քաղաքային իշխանությունը առնվազն 1 օր առաջ են երթևեկության սահմանափակումների մասին հայտարարում, ոչ թե՝ միջոցառման մեկնարկից 2-3 ժամ առաջ: 
Երկրորդը՝ նման հայտարարությամբ ոստիկանությունը, իրենց խելքին՝ «հող է նախապատրաստում» իրենց գազանությունները համառորեն, ռուսերեն կասեին՝ «վ ուպոռ» (դիմահար) չտեսնող «արևմտյան քաղաքակիրթ հանրույթի» համար, որպեսզի արդարացնեն ա) ոստիկանական զորքերի կուտակումները, բ) դրանց հնարավոր «դրսևորումները»:
Բայց դրական պահ էլ կարելի է այստեղ տեսնել: Օրինակ, կարելի է մեկնաբանել այսպես, որ ոստիկանությունը յուրովի «միացավ» հայ ժողովրդին ու որոշեց իր նախաձեռնությամբ «փակել» Օպերայի տարածքը: 
Ա.Հ.
Zham.am