Վայոց ձորի մարզում ոստիկանը հարվածել է բողոքի ակցիայի մասնակցի քունքին, վնասել մարդու տեսողությունը (տեսանյութ)

Լրագրող Նարինե Կիրակոսյանը իր յութուբյան ալիքում հրապարակել է տեսանյութ, որտեղ քաղաքացի Անուշավան Ավետիսյանը (Ագարակաձորի ավագանու անդամ) ներկայացրել է մանրամասնություններ ինչպես ճանապարհ փակելու ակցիայի մասին, այնպես էլ՝ ոստիկանության կողմից իր նկատմամբ դաժան վերաբերմունքի վերաբերյալ: 
Դատելով քաղաքացու պատմածից, ոստիկանության ծառայողը առանձնակի դաժանությամբ ու չարամիտ դիտավորությամբ է հարվածել մարդու քունքին, ամենայն հավանականույթամբ՝ ցանկանալով նրան կյանքից զրկել կամ պատճառել ծանր մարմնական վնասվածք: Այժմ, ոստիկանները, իհարկե, «երդում են ուտում», թե անգամ մատով չեն դիպել նրան: Մինչդեռ դեպքից 2 օր անց էլ նկատելի է, որ քաղաքացու աջ աչքն ամբողջովին արյունազեղված է:  
Իրական իրավապաշտպանների ուշադրությունն ենք հրավիրում նաև վերը նկարագրված խայտառակ դեպքի վրա: 
Ի դեպ, այս օրերին ծավալվող բողոքի այլ ակցիաների ժամանակ էլ նկատելի է, որ ոստիկանները ագրեսիվ ու կատաղած հարձակվում են քաղաքացիների վրա, հասցնում այնպիսի հարվածներ, որոնցով հատուկ նպատակ են հետապնդում հենց սպանել ցուցարարներին, պատճառել ծանր մարմնական վնասվածքներ: Օրինակ, Նոյեմբերյանում այդպես հարձակվել էին գնդապետ Մախսուդյանի վրա, թիրախային հարվածներ հասցնելով պաշտոնաթող զինվորականի գլխին, ինչի հետևանքով մարդը հոսպիտալացվել էր: Ու դա եզակի դեպք չէ: 
Այդ ամենը թույլ է տալիս առնվազն ենթադրել, որ իշխանության, շատ հնարավոր է՝ անձամբ Փաշինյանի կողմից ոստիկանությանը հրահանգ է իջեցվել, որ ըստ հնարավորության՝ սպանեն առավել ակտիվ ցուցարարներին, գործեն առավելագույն դաժանությամբ, առանց մեծ ու մանուկ, կին ու ծեր խնայելու: 
Ըստ էության, ոստիկանությունն այս օերերին դրսևորվում է հնարավորինս գազանաբարո, ինչը չի կարող որևէ աղերս ունենալ ոչ միայն օրինականության, այլև մարդ կոչվելու հետ: Ոստիկանությունը, ենթարկվելով Փաշինյանի ու նրա զուգահեռդասարանցի նախարարի անձնիշխանական հրամաններին, ինքը իրեն կտրուկ դուրս է դնում օրենքի և օրինականության շրջանակից: 
Ա.Հ.
Zham.am