Իսրայելը հրթիռային հարված է հասցրել Իրանին
Իսրայելը, ապրիլի լույս 19-ի գիշերը, հրթիռային հարված է հասցրել մեր հարևան Իրանին: Ըստ միջազգային լրատվամիջոցների հաղորդումների, իրանական տարբեր քաղաքներում լսվել են պայթյունների ձայներ, այդ թվում՝ ՀՕՊ միջոցների գործադրմամբ պայմանավորված պայթյուններ:
Իսրայելն այս հարձակումը նշում է, որպես ապրիլի 14-ին Իրանի կողմից հասցված հրթիռային ու ԱԹՍ-ներով հարվածի պատասխան քայլ: Իսկ Իրանի այդ հարվածն էլ, ինչպես հայտնի է, պատասխան էր Իսրայելի կողմից ապրիլի 1-ին Դամասկոսում Իրանի դեսպանատան վրա կատարված հարձակման, որը միջազգային բոլոր նորմերի բացահայտ ոտնահարում էր:
Ինչ վերաբերում է Իսրայելի այս՝ գիշերային հարձակմանը, ապա հարվածներ են ուղղվել Սպահանի մերձակայքում գտնվող օդանավակայանին, հաղորդվում է, որ ՀՕՊ միջոցներ են գործարկվել նաև Թավրիզում: Բացի այդ, նշվում է, որ Թեհրանի, Թավրիզի, Սպահանի, Շիրազի օդանավակայանների աշխատանքը և Իրանի արևմտյան հատվածում օդային հաղորդակցությունը դադարեցվել են:
Իր հերթին, ամերիկյան լրատվամիջոցներն էլ հաղորդում են, որ ԱՄՆ-ը չի մասնակցել Իրանի վրա Իսրայելի այս հրթիռային հարձակմանը:
Հետևեք մեզ Facebook-ում