Փաշինյանական իշխանությունները կարծես նպատակադրվել են խոշտանգել քպ-ական դեպուտատին «հակահայ ***ածք» անվանած 44-օրյա պատերազմի մասնակցին

Փաշինյանին սպասարկող իրավապահների կողմից երեկ կամայականորեն ձերբակալված Սամվել Վարդանյանի կյանքին ու առողջությանը վտանգ է սպառնում: Հիշեցնենք, Սամվել Վարդանյանը 44-օրյա պատերազմի մասնակից է, երեկ հանրային տրանսպորտում նկատելով քպ-ական դեպուտատ Հակոբ Ասլանյանին, նրա հասցեին կոշտ արտահայտություն է արել: Փաշինյանական ոստիկանությունը երեկ երեկոյան անհիմն կերպով ազատությունից զրկել է ՀՀ քաղաքացուն: Ավելին, պարզվում է, որ այսպես կոչված ոստիկանները ինչ-որ «դիմակավորված անձանց» թույլ են տվել խմբակային դաժան ծեծի ենթարկել իրենց հսկողության տակ գտնվող ձերբակալված անձին:
Քիչ առաջ «հրատապ ու արտակարգ լայվ» վերտառությամբ ֆեյսբուքյան ուղիղ միացման ժամանակ իրավապաշտպան, ձերբակալված Սամվել Վարդանյանի իրավունքները պաշտպանող Ռուբեն Մելիքյանն ուղղակի խայտառակ, եթե չասվի՝ սահմռկեցուցիչ տեղեկություններ հաղորդեց իր պաշտպանյալի նկատմամբ ստորագույն խոշտանգումների ու բռնության դիմելու վերաբերյալ: 
Բանն այն է, որ երբ ընդդիմադիր պատգամավորներն այցելել են ՁՊՎ ու տեսակցել Սամվել Վարդանյանին, նրա մարմնին նկատել են բռնության հետքեր: 
Ռուբեն Մելիքյանը նշում է. «Քիչ առաջ տեղեկություն ստացանք ձերբակալվածների պահման վայրից (ՁՊՎ): Երբ այսօր երկու ընդդիմադիր պատգամավորներ այցելել են երեկ հայտնի միջադեպով ձերբակալված Սամվել Վարդանյանին: Նա տեղեկացրել էր, որ երեկ ՁՊՎ գնալու ճանապարհին մեքենան վարողները կանգնեցրել են, դուրս են եկել իբրեւ բնական կարիքները հոգալու, եւ մի քանի դիմակավորված անձ անմիջապես իրեն դուրս են հանել մեքենայից ու դաժան ծեծի ենթարկել: Այդ թվում սպառնալիքներ եւ այլն, այս պահին չեմ շարունակում: Պահանջում եմ մեքենայի շարժը տեսախցիկներով ֆիքսել, տեսագրությունները պետք է դառնան քրեական գործի մաս:
Սամվելի վրա կան որոշ մարմնական վնասվածքների հետքեր, նաեւ հագուստի մասով հետքեր: Սա իշխանությունների կողմից արդեն բանդաներ ձեւավորած լինելու մասին է՝ հայկական արժեքներ պաշտպանող մարդկանց նկատմամբ»,- ասաց իրավապաշտպանը:

Այս տեղեկությունները թույլ են տալիս առնվազն նկատել, որ Նիկոլ Փաշինյանն ու նրա գլխավորած իշխանությունը  նպատակադրվել են խոշտանգել Սամվել Վարդանյանին:
Ըստ որում, հաշվի առնելով անձամբ Փաշինյանի մանրախնդիր ու ոխակալ բնավորությունը, չի կարելի բացառել, որ նա նաև անձնական վրեժ է ուզում լուծած լինել, քանի որ ավելի վաղ Սամվել Վարդանյանը նրա հասցեին բացականչել էր՝ «դավաճա՛ն»: 
Եթե մինչև երեկո տվյալ ոստիկանները, որոնք վարել են մեքենան, նրանց գործակից «դիմակավորվածները», իրենց ոստիկանապետի ու ՆԳ նախարարի գլխավորությամբ համակարգից անհապաղ ու ցմահ չհեռացվեն, անմիջապես խոշտանգման ու նաև սպանության հանցափորձի, նաև, ինչպես իրավապաշտպանը նշեց, բանդա կազմելու և միտումնավոր մարմնական վնասվածքներ պատճառելու մեղադրանքներով չկալանավորվեն, ապա արդեն ոչ մի կասկած չի մնա, որ տեղի ունեցածը կատարվել է անձամբ Փաշինյան Նիկոլի հրահանգով: 
Այսպես սրանք մեկ-մեկ պատրաստ են հոշոտել բոլորիս: Հետևություններ անելու համար երբեք ուշ չէ, որքան էլ ուշ թվա: 

Ռուբեն Մելիքյանի ֆեյսբուքյան լայվ միացման հղումը՝ 
https://www.facebook.com/watch/live/?ref=watch_permalink&v=954127806210204
Արխիվային լուսանկարը՝ «Առավոտ»-ի էջից

Վրեժ Ահարոնյան
Zham.am