Իրանն ավարտված է հայտարարել Իսրայելի դեմ պատասխան գործողությունը՝ «հաջորդ սխալի» դեպքում սպառնալով ավելի սաստիկ հարվածով

Իսրայելի դեմ ռազմագործողությունը կարելի է համարել ավարտված, բայց եթե իսրայելական ղեկավարությունը հերթական «սխալը» գործի, ապա ավելի խիստ պատասխան կստանա: Նման հայտարարությամբ է հանդես եկել ՄԱԿ-ում Իրանի մշտական ներկայացուցչությունը՝ X (Թվիթթեր) սոցցանցում: 
Ինչպես հաղորդում են օտարերկրյա լրատվական գործակալությունները, Իրանի դիվանագիտական ներկայացուցչությունն ընդգծել է, որ ԻԻՀ կողմից հարվածային ԱԹՍ-ներով ու հրթիռներով Իսրայելին ուղղված հարվածը «պատասխան էր ագրեսիային»: Խոսքն Իսրայելի կողմից Իրանի վրա կատարված հարձակման մասին է, երբ, ի խախտումն ընդունված բոլոր նորմերին, իսրայելական բանակը հրթիռահարել էր Դամասկոսում Իրանի գլխավոր հյուպատոսությունը, ինչի հետևանքով մի խումբ իրանցի զինվորականներ էին զոհվել, այդ թվում՝ 2 բարձրաստիճան զինվորական:
Իրանի ներկայացուցչության հայտարարության մեջ նշվում է, որ ապրիլի 13-ի ռազմագործողությունն իրականացվել է ՄԱԿ կանոնադրության 51-րդ հոդվածի հիման վրա, որն իրավունք է վերապահում կազմակերպության անդամ-երկրներին, իրենց վրա հարձակվելու դեպքում, դիմել անհատական և կոլեկտիվ ինքնապաշտպանության: 
«Ռազմագործողությունը կարելի է համարել ավարտված: Սակայն, եթե իսրայելական վարչակազմը ևս մեկ սխալ գործի, ապա Իրանի պատասխանը շատ ավելի սաստիկ է լինելու»,-ասված է ՄԱԿ-ում Իրանի մշտական ներկայացուցչության տարածած հայտարարության մեջ: 
Միջազգային լրատվամիջոցները հաղորդում են նաև, որ Իսրայելի պաշտպանության բանակի՝ «Ցախալի» տվյալներով, Իրանը կիրառել է մոտ 185 հարվածային ԱԹՍ, 36 թևավոր և «երկիր-երկիր» կարգի 110 հրթիռ: Իսրայելական կողմը հայտարարում է, թե իրանական հարվածի հետևանքով հասցված վնասներն աննշան են: 
Zham.am