Կբացվի լուսանկարիչ Գագիկ Գասպարյանի «Հիշողության ձեղնահարկ» խորագրով լուսանկարչական աշխատանքների ցուցահանդեսը

Ս. թ. դեկտեմբերի 6-ին, ժամը 14:00-ին, Հովհաննես Շարամբեյանի անվան ժողովրդական արվեստի կենտրոնում կբացվի լուսանկարիչ Գագիկ Գասպարյանի աշխատանքների ցուցահանդեսը՝ «Հիշողության ձեղնահարկ» խորագրով: Կներկայացվի ժապավենային 50 լուսանկարչական աշխատանք:

Ցուցահանդեսը կգործի մինչև ս. թ. դեկտեմբերի 14-ը:

Ցուցադրությունը ներառում է 80-ական թվականները ներկայացնող կոլորիտային լուսանկարչական շարքեր՝ դիմանկարներ, բնապատկերներ, հուշարձաններ, քաղաքային տեսարաններ, որոնք տվյալ ժամանակահատվածի մասին պատմող վավերագրական պատկերներ են, լուսանկարչության գեղարվեստականության մասին փաստող արժեքներ:

Հեղինակը ցուցահանդեսը նվիրում է իր որդու՝ լուսանկարիչ և օպերատոր Մուշ Գասպարյանի և կյանքից վաղ հեռացած բոլոր լուսանկարիչների ու օպերատորների հիշատակին:

Գասպարյանն աշխատել է Հեռուստատեսության և ռադիոյի պետական կոմիտեում, հեռուստաֆիլմերի «Երևան» կինոստուդիայում, Կառավարությանն առընթեր Հուշարձանների պահպանության և վերականգնման վարչությունում: Վերջին տարիներին որպես օպերատոր աշխատել է «Արմենիա», «Թի վի 5», «Շանթ» հեռուստաընկերություններում:

Նրա առաջին ուսուցիչը՝ հարևանությամբ բնակվող հայտնի լուսանկարիչ Նեմրութ Բաղդասարյանն էր: