Միակ բանը, որ կարելի է հակադրել պաշտոնական գծին, ժողովուրդն է և ժողովրդական դիմադրությունը. Զատուլին

Հայաստանի իշխանությունները փորձում են վերափոխել ոչ միայն Հայաստանի Հանրապետության արտաքին քաղաքականությունը կամ չեղարկել «Միր» քարտերը երկրի տարածքում, նրանք ցանկանում են վերաձևակերպել հայ ժողովրդի գիտակցությունը, և դա նրանց մոտ վատ չի ստացվում։ Այս մասին Alpha News-ի հետ զրույցում ասել է Պետդումայի ԱՊՀ գործերով, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը:

«Այսօր արդեն պարզ է, եթե լսենք Փաշինյանին և նրա թիմակիցներին, որ Ռուսաստանն այլևս դաշնակից չէ։ Նրանք հեռանում են Ռուսաստանի հետ միությունից, ոչ մի դաշինք ՌԴ-ի հետ չկա, պետք էլ չէ ։ Նրանք փորձում են վերաձևակերպել ոչ միայն ՀՀ արտաքին քաղաքականությունը կամ չեղարկել «Միր» քարտերը երկրի տարածքում, նաև ցանկանում են վերաձևակերպել հայ ժողովրդի գիտակցությունը, և պետք է ասել, որ նրանց մոտ ստացվում է»,-ընդգծել է Զատուլինը։

Նրա խոսքով՝ Հայաստանի իշխանությունը, որը հանձնել է Լեռնային Ղարաբաղը, հայտարարում է, որ տեղի ունեցածի մեղավորը բացառապես Ռուսաստանն է։

«Զարմանալի է, բայց փաստ է: Միակ բանը, որ կարելի է հակադրել պաշտոնական գծին, դա ժողովուրդն է և ժողովրդական դիմադրությունը։ Եթե Հայաստանում հայերի մոտ կասկած է առաջացել, որ Ռուսաստանի հետ այդ բարեկամությունը, ռուս ժողովրդի հետ հարաբերություններն իրենց համար նշանակալից են, ապա, իհարկե, դա կանգնեցնել հնարավոր չէ։ Իսկ ի՞նչ կլինի, եթե Հայաստանի իշխանությունը, համաձայնելով իր ժողովրդի հետ, պաշտպանություն է ակնկալում ոչ թե Ռուսաստանից, այլ Ֆրանսիայից և ԱՄՆ-ից, ընդ որում, մտադիր չէ ոչինչ ձեռնարկել իր փրկության համար։

Լեռնային Ղարաբաղի պատմության մեջ Հայաստանի իշխանությունն ինքն է դարձել պատերազմում ձախողման, պարտության նախաձեռնողը։ Ղարաբաղում իրենց հայրենակիցներին պաշտպանելու համար ոչ մի իրական աշխատանք նրանք չեն ձեռնարկել։ Անհնար է պաշտպանել Լեռնային Ղարաբաղը դրսից, եթե Հայաստանն ինքը՝ ի դեմս իր իշխանության, հրաժարվում է դրանից»,-հավելել է նա։