Էրդողան. «ԱՄՆ-ի՝ Թուրքիային պատժել և ծնկի բերել բոլոր փորձերը կձախողվեն»

ԱՄՆ-ն ցանկանում է պատժել և վարկաբեկել Թուրքիան, քանի որ այն չի ենթարկվում արտաքին ուժերի կողմից պարտադրված սցենարներին: Ինչպես տեղեկացնում է ՌԻԱ «Նովոստի»-ն, նման հայտարարությամբ է հանդես եկել Թուրքիայի նախագահ Ռեջեփ Թայիփ Էրդողանը՝ ելույթ ունենալով իշխող «Արդարություն և զարգացում» կուսակցության ակտիվիստների առաջ Ագրա քաղաքում: 

«Նրանք փորձում են պատժել, դատապարտել և վարկաբեկել մեզ, որովհետև մենք չենք շարժվում նրանց սցենարներով, որոնք ակնհայտ են և իրականացվում են մեր երկրում համահեղինակների օգնությամբ: Նրանք դա անում են FETÖ–ի հետ (ընդդիմադիր իսլամիստ քարոզիչ Ֆեթուլլահ Գյուլենի կազմակերպությունը): Սակայն նրանք պետք է իմանան, որ չեն կարողանա խաբել մեզ»,- հայտարարել է Էրդողանը:

Երկրի ղեկավարը նաև մեղադրել է Վաշինգտոնին Քրդական աշխատավորական կուսակցությանն (PKK) աջակցելու մեջ:

«Այդ սցենարի մի մասն են կազմում ԱՄՆ-ում Թուրքիայի քաղաքացիների դեմ դատերը… Մեր հասցեին այդ հարձակումների, ստի և վարկաբեկման ալիքը միասնական սցենարի մաս է, որն ուղղված է երկիրը ծնկի բերելուն և մեր հասարակությունում պառակտում առաջացնելուն: Այդ բոլոր փորձերը կձախողվեն»,- հայտարարեց Էրդողանը:

Zham.am