Ոսկեպարցիները Փաշինյանի ադրբեջանցիներին հանձնելու տարածք չունեն

Տավուշի և Շիրակի թեմերի առաջնորդները Ոսկեպարի 7-րդ դարի եկեղեցում պատարագ են մատուցել, ոսկեպարցիները Նիկոլ Փաշինյանին դիմում են պատրաստել: Այս մասին իր ֆեյսբուքյան էջում գրել է լրագրող Ոսկան Սարգսյանը:
«Այսօր՝ մարտի 16-ին սահմանագծին գտնվող, 7-րդ դարի կառույց Ոսկեպարի Սուրբ Աստվածածին եկեղեցում ՀԱԵ Տավուշի և Շիրակի թեմերի առաջնորդներ Բագրատ արքեպիսկոպոս Գալստանյանը և Միքայել արքեպիսկոպոս Աջապահյանը պատարագ են մատուցել, որին ներկա են եղել Ոսկեպարի բազմաթիվ բնակիչներ։

Պատարագից հետո Միքայել արքեպիսկոպոս Աջապահյանը հայտարարել է, որ 7-րդ դարի սուրբ եկեղեցու քարերը զորեղ են։ Նա ասել է, որ 1918թվականին այլևս նահաջելու տեղ չկար, եղավ Սարդարապատի հաղթական ճակատարամարտը, հիմա էլ Ոսկեպարն է մեր նահանջի վերջը, այստեղից է սկսվելու հաղթանակը։ Բագրատ արքեպիսկոպոս Գալստանյանը վերհիշել է Մոնթեի խոսքերը, որ Արցախը հանձնելով կփակենք մեր պատմության վերջին էջը ու հավելել է, որ Ոսկեպարը հանձնելով կփակենք մեր պատմության գիրքը, մեր դագաղի վերջին մեխը կխփենք։ Նա ասել է, որ Ոսկեպարը միայն գյուղի տները չեն, Ոսկեպարը մեծ հասկացություն է, շատ բան է ներառում , այդ թվում կոմունիկացիաներ։

Այնուհետ երկու թեմերի առաջնորդները Ոսկեպար գյուղում հանդիպում են ունեցել բնակիչների հետ, որին ներկա են եղել նաև Ոսկեպարի բնակիչ, բանակային կորպուսի շտաբի նախկին պետ, գնդապետ Միհրան Մախսուդյանը, ԵԿՄ Տավուշի մարզային կազմակերպության ղեկավար Յուրա Հարությունյանը։ Ոսկեպարի բնակիչները ստորագրավաք-դիմում են պատրաստել՝ ուղղված վարչապետ Նիկոլ Փաշինյանին։ Ոսկեպարցիները դիմումի մեջ հայտնել են, որ իրենք դեմ են սահմանագոտում Ադրբեջանին տարածքներ հանձնելուն»։