ԵԱՀԿ/ԺՀՄԻԳ-ը կոչ է արել ՀՀ իշխանություններին քաղաքական կամք դրսևորել ընտրողների վրա ճնշում գործադրելու միջոցների կիրառման դեմն առնելու համար

ԵԱՀԿ Ժողովրդավարական հաստատությունների ու մարդու իրավունքների գրասենյակը (ԺՀՄԻԳ) նոյեմբերի 29-ից դեկտեմբերի 1-ն այցելել է Երևան՝ ներկայացնելու Հայաստանում ապրիլի 2-ին կայացած խորհրդարանական ընտրությունների վերաբերյալ ԵԱՀԿ/ԺՀՄԻԳ դիտորդական առաքելության վերջնական զեկույցը:

Զեկույցի բովանդակությունը քննարկվել է ՀՀ Ազգային ժողովի, Կենտրոնական ընտրական հանձնաժողովի, քաղաքական կուսակցությունների, կառավարության, քաղաքացիական հասարակության, ինչպես նաև միջազգային հանրության ներկայացուցիչների հետ հանդիպումների շրջանակում:

ԺՀՄԻԳ թիմը նշել է հետագա համագործակցության համար հավանական ոլորտները, ինչպես նաև հստակ քայլեր առաջարկել տարբեր շահագրգիռ կողմերի առաջարկած հանձնարարականները կյանքի կոչելու համար:

ԺՀՄԻԳ թիմն առանձնահատուկ ուշադրություն է դարձրել այն հանձնարարականներին, որոնք վերաբերում են ձայների գնմանն ու պետական ռեսուրսների չարաշահման խնդիրների լուծմանը և որոնք կօգնեն ամրապնդել հասարակության վստահությունն ընտրական գործընթացի հանդեպ:

Զեկույցի հեղինակները խորհուրդ են տվել իրականացնել մի շարք ընտրական բարեփոխումներ, որոնք կօգնեն վերացնել քարոզարշավի անցկացման, ֆինանսավորման, բողոքարկման իրավունքի ու բողոքները ներկայացնելու վերջնաժամկետի հարցերում առկա թերությունները: Փաստաթղթում կարևորություն է տրվել հետագա ջանքերին, որոնք կօգնեն հաշմանդամություն ունեցող մարդկանց դառնալ ընտրական գործընթացի լիիրավ մասնակից, կավելացնեն կանանց ներգրավվածությունն ընտրական գործընթացին, ինչպես նաև կբարձրացնեն ընտրական կառավարման աշխատանքի արդյունավետությունը:

Միևնույն ժամանակ, ԺՀՄԻԳ թիմի անդամների մեծ մասն ընդգծել է Հայաստանում ընտրական գործընթացի նկատմամբ հանրային վստահության պակասը՝ կոչ անելով իշխանություններին քաղաքական կամք դրսևորել ընտրողների վրա ճնշում գործադրելու բոլոր միջոցների կիրառման դեմն առնելու համար ու հրապարակայնորեն քննադատել ձայների գնման ու վաճառման պրակտիկան:

«Գիտակցելով շահագրգիռ կողմերի պատրաստակամությունն ընտրական գործընթացի վերաբերյալ տրված հանձնարարականները կյանքի կոչելու հարցում՝ անհրաժեշտ է խոր և համապարփակ խորհրդատվություն, որպեսզի բարեփոխումները հաջող իրականացվեն»,-ասել է ԺՀՄԻԳ դիտորդական առաքելության ղեկավարի տեղակալ Դոնալդ Բիսսոն:

Մինչդեռ ԺՀՄԻԳ ընտրական բաժնի ղեկավար Ալեքսանդր Շլիկը ԺՀՄԻԳ անունից պատրաստակամություն է հայտնել աջակցել տրված հանձնարարականների իրագործմանը: