Մենք ընտրություններով հանելու ենք այս իշխանություններին, պրոցեսը հեշտ չէ, բայց մենք այդ ճանապարհին ենք. Մարության (տեսանյութ)

Մենք բազմիցս ասել ենք, որ մեր քաղաքական ուժը գնալու է ինստիտուցիոնալ լուծումներ, մենք մասնակցելու ենք ընտրություններին եւ ընտրություններով հանելու ենք այս իշխանությանը: Այս մասին այսօր՝ մարտի 12-ին, Երեւանի քաղաքապետարանի դիմաց լրագրողների հետ զրույցում ասաց Երևանի նախկին քաղաքապետ Հայկ Մարությանը:
«Մենք ձեւավորելու ենք նոր իշխանություն, որն իրականում կանի այն, ինչ ասում էր 2018 թվականին:
Այդ պրոցեսը հեշտ չի, պրոցեսը ինչ-որ ժամանակ պետք է տանի, բնականաբար, մենք այդ ճանապարհին ենք»,-ասաց նա:

Իրենք ասում էին՝ մենք կարմիր գծերը ուզում ենք թանկացնել, որպեսզի մեքենաների հոսքը քչացնենք. Ես ամեն օր Անավից իջնում եմ կենտրոն ու բարձրանում. Հոսքը նույն ձեւ մնացել է: Այս մասին այսօր՝ մարտի 12-ին, Երեւանի քաղաքապետարանի դիմաց լրագրողների հետ զրույցում ասաց Երևանի նախկին քաղաքապետ Հայկ Մարությանը:

«Փաստացի հոսքը մնաց նույնը, ուղղակի մարդիկ հայտնվեցին վատ վիճակում: Դուք տեսե՞լ եք՝ բակերում ինչ է կատարվում, խայտառակություն է: Դուք մարդ ճանաչո՞ւմ եք, որ ավտոյով էր երթեւեկում, հիմա արդեն տրանսպորտով է երթեւեկում:

Իրենք կարմիր գծերը թանկացնում էին, որ մարդիկ տրանսպրտով երթեւեկեն, բայց հիմա իրենք տրանսպորտն էլ են թանկացնում: Այս երկու պրոցեսներն իրար հետ չեն բռնում»,-ասաց նա:

Հարցին, թե երբ են նախաձեռնելու տրանսպորտի թանկացման դեմ ակցիաներ, Մարությանը պատասխանեց. «Եթե այսօր այդ որոշումն ընդունվի, որն ուժի մեջ է մտնելու սեպտեմբերի 1-ից, ապա մենք օգոստոսի վերջում կիրազեկենք մարդկանց, թե ինչ ենք անելու, ոնց ենք անելու եւ երեւանցիների հետ համատեղ թույլ չենք տալու, որ այս որոշումն իրենք իրագործեն: Դա 100 տոկոսով աշխատելու է, մենք մի անգամ դա արել ենք: Այստեղ մի քանի ավելի հետաքրքիր բան կմտածենք եւ նույն բանը կանենք:

Նաեւ խորհուրդ եմ տալիս քաղաքային իշխանություններին սրա վրա շատ ջանք ու ժամանակ չծախսել, որովհետեւ չի ստացվելու: Դուք ավելի լավ է այսօրվանից մտածեք մեր առաջարկի մասին: Այսինքն մարդը ունենում է քարտ, լիցքավորում է այնքան, ինչքան ուզում է եւ տրանսպորտ բարձրանալիս հպում է եւ ամեն անգամ իր քարտից գնալու է 100 դրամ»,-ասաց Մարությանը:
Աղբյուր՝ News.am