Մարկ Ցուկերբերգի քրոջը հրաժարվել են փրկել սեռական ոտնձգություններից

Ուշագրավ դեպք է տեղի ունեցել Լոս Անջելեսից (ԱՄՆ) դեպի Մասաթլան (Մեքսիկա) «Alaska Airlines»-ի կողմից իրականացվող չվերթի ժամանակ: «Zuckerberg Media»-ի գլխավոր տնօրեն, «Ֆեյսբուք» սոցիալական ցանցի հիմնադիր Մարկ Ցուկերբերգի քույրը՝ Ռենդի Ցուկերբերգը «Թվիթթեր» միկրոբլոգի իր էջում պատմել է, որ չվերթի ժամանակ դարձել է սեռական ոտնձգությունների զոհ, սակայն բորտուղեկցողները հրաժարվել են օգնել նրան: 

Ըստ Ռենդի Ցուկերբերգի՝ երբ նա զբաղեցրել է իր տեղը օդանավում, կողքի նստարանում գտնվող տղամարդը սկսել է պատմել իրեն իր սեռական երազանքների մասին և մեկնաբանություններ թողնել անցնող կանանց հասցեին:  

«Zuckerberg Media»-ի տնօրենն այդ առթիվ բողոքել է բորտուղեկցուհուն՝ պահանջելով այլ տեղ նստացնել տարօրինակ պահվածք դրսևորող տղամարդու, սակայն բորտուղեկցուհին պատասխանեց, որ տվյալ տղամարդը շատ հաճախ է օգտնվում իրենց ավիաընկերության ծառայություններից, և նա չի կարող տեղափոխել նրան: Փոխանակը, այլ նստատեղ տեղափոխվելու առաջարկն արվել է Ցուկերբերգին, սակայն վերջինս հրաժարվել է՝ պատճառաբանելով, որ հենց նա է դարձել սեռական ոտնձգությունների զոհ, և չի պատրաստվում լքել իր տեղը:

Կինը պատմել է, որ 3 ժամ շարունակ ստիպված է եղել լսել տղամարդու պատմությունները, սակայն ոչ մեկ նրան այդպես էլ կարգի չի հրավիրել: Ավելին, բորտուղեկցուհիներն անընդհատ ժպտում էին տարօրինակ ուղևորին և հարցնում ՝ արդյոք այս անգամ էլ նա պատրաստվում է իրեն «վատ պահել»:

«Alaska Airlines»-ի ներկայացուցիչները հայտարարել են, որ մանրամասն կուսումնասիրեն տեղի ունեցածը: Բացի այդ, նրանք ժամանակավորապես արգելել են տղամարդուն օգտնվել ավիաընկերության բոնուսային համակարգից: 

Zham.am