Փաշինյանն ու իր կինը, հարկատուների հաշվին, մեկնել են Հունաստան, «բարձրաստիճան զբոսանքի»

Նիկոլ Փաշինյանը կնոջ՝ Աննա Հակոբյանի հետ, Հայաստանի հարկատուների գրպանի հաշվին, աշխատանքային այցով մեկնել է Հունաստան:
Այս մասին տեղեկանում ենք Փաշինյանի խոսնակ Նազելի Բաղդասարյանի ֆեյսբուքյան էջից։
«Այցի շրջանակում նախատեսված են ՀՀ վարչապետի հանդիպումները Հունաստանի նախագահ Կատերինա Սակելլարոպուլուի, վարչապետ Կիրիակոս Միցոտակիսի և խորհրդարանի նախագահ Կոնստանտինոս Տասուլասի հետ», - նշված է հաղորդագրության մեջ:
Ընդգծենք, որ «աշխատանքային այցերի» դեպքում, ըստ ընդունված արարողակարգի, չի նախատեսվում, որ պաշտոնյան մեկնի կնոջ ուղեկցությամբ: Պետք է ենթադրել, որ Աննա Հակոբյանը արտասահմանյան շրջագայության մեկնել է իր անձնական միջոցների, այլ ոչ թե՝ հարկատուների միջոցների հաշվին: 
Ի դեպ, Փաշինյանն ու իր կինը դուրս են եկել կառավարական առանձնատնից, որը պահվում է հարկատուների հաշվին, օդանավակայան են մեկնել զրահապատված գերթանկարժեք մեքենայով, որը ձեռք է բերվել հարկատուների վճարած միջոցներով, օդանավակայան են հասել հարկատուների հաշվին ասֆալտապատված ճանապարհով, Հունաստան են թռել նույնպես հարկատուների միջոցներով պահվող օդանավով: 
Հարց է ծագում, թե ինչո՞ւ այդքան միջոցներ պիտի հարկատուները վատնեն մի զույգի առոք-փառոք, ճոխ ու անհոգ ապրուստի համար, երբ նրանք նույն հարկատուների կյանքը վերածել են ամենաիսկական դժոխքի ու արնածոր մղձավանջի: