Արցախն Ադրբեջանի մաս ճանաչելու Հայաստանի կառավարչի որոշումը որևէ կապ չունի հայ ժողովրդի հավաքական կարծիքի հետ. Էդուարդ Շարմազանով

Ինչպես արդեն տեղեկացրել ենք,  փետրվարի 15-17-ը ՌԴ մայրաքաղաք Մոսկվայում տեղի է ունենում «Ընդդեմ գաղութատիրության. Հանուն ազգերի ազատության» հիմնադիր համաժողովը, որին մասնակցում է նաև Հայաստանի հանրապետական կուսակցության (ՀՀԿ) պատվիրակությունը: Համաժողովը կազմակերպվել է ՌԴ կառավարող «Միասնական Ռուսաստան» կուսակցության կողմից։

Պատվիրակությունը ղեկավարում է ՀՀԿ ԳՄ անդամ, Ազգային ժողովի (ԱԺ) նախկին փոխնախագահ Էդուարդ Շարմազանովը։ Պատվիրակության կազմում են նաև ԱԺ «Պատիվ ունեմ» ընդդիմադիր խմբակցության ղեկավար Հայկ Մամիջանյանն ու պատգամավոր Աննա Մկրտչյանը։ Համաժողովին մասնակցում են 50 երկրների պատվիրակություններ, այդ թվում` Ադրբեջանի ու Թուրքիայի իշխող ուժերը ներկայացնող։ Հայաստանից, մեր տեղեկություններով, համաժողովին մասնակցելու է նաև «Բարգավաճ Հայաստան» կուսակցությունը։

Այսօր ՀՀԿ պատվիրակության ղեկավար Էդուարդ Շարմազանովը ելույթ է ունեցել համաժողովի պլենար նիստին:

«Հարգելի գործընկերներ, 
Ազգերի ազատությունը բազմաբևեռ աշխարհի հիմնական սկզբունքն է, իսկ ազգերի ինքնորոշման իրավունքը՝ միջազգային իրավունքի ամենահիմնարար սկզբունքներից։
1991թ.-ին, առաջնորդվելով այդ սկզբունքով, Արցախի ժողովուրդը  հռչակեց իր անկախությունը՝ իրականացնելով հանրաքվե։ Այնուհետև միջազգային հանրությունը ձևավորեց հայտնի երեք սկզբունքները՝ ուժի չկիրառում, տարածքային ամբողջականություն, ազգերի ինքնորոշման իրավունք։ Այդ սկզբունքներն էին ներառված և՛ Մադրիդյան, և՛ Կազանյան փաստաթղթերում։ Ավելին, 2009-2013թթ. ՌԴ, ԱՄՆ-ի և Ֆրանսիայի նախագահներն ամրագրեցին այդ սկզբունքներն իրենց ստորագրություններով։
Չնայած այդ հանգամանքին՝ Ադրբեջանը 2020թ.-ի աշնանն ու 2023թ.-ի սեպտեմբերին օկուպացիոն պատերազմ սկսեց Արցախի դեմ՝ հայաթափելով այն։ Դա տեղի ունեցավ միջազգային  դերակատարների անգործության ու Հայաստանի կառավարիչների չմիջամտելու պայմաններում։
Ակնհայտ է,որ Արցախի հայաթափումը տեղի ունեցավ արևմտյան հարթակներում  Հայաստանի կառավարչի կողմից Արցախն Ադրբեջանի մաս ճանաչելուց հետո 2022-ի հոկտեմբերի 6, Պրահա):
Հարկ է նշել, որ ո՛չ Արցախի, և ո՛չ էլ Հայաստանի քաղաքացիները նրան այդ իրավունքը չէին տվել։ Հայ ժողովուրդն Արցախը չի ճանաչել Ադրբեջանի մաս. Հայաստանի կառավարչի որոշումը կապ չունի հայ ժողովրդի հավաքական կարծիքի հետ»,- ասել է Էդուարդ Շարմազանովը:
Աղբյուր՝ 168.am