Մալխաս Ամոյան. Հաղթանակս նվիրում եմ հայ և եզդի ազգերին (լուսանկարներ)

Հունահռոմեական ոճի ըմբշամարտի Եվրոպայի արդեն եռակի չեմպիոն Մալխաս Ամոյանը Բուխարեստում անցկացված առաջնության ոսկե մեդալը նվաճելուց հետո բացառիկ մեկնաբանություն է տվել ArmSport-ին . «Ուրախ եմ, որ կարողացա դառնալ Եվրոպայի եռակի չեմպիոն:  Այս տարի մի փոքր ավելի բարդ ստացվեց: Չորս գոտեմարտ անցկացրեցի, ընդ որում մեկ քառորդ և կիսաեզրափակիչ գոտեմարտերը մի փոքր ծանր տրվեցին: Հաղթանակս նվիրում եմ հայ և եզդի ազգին»,- ասել է Ամոյանը: 
Հիշեցնենք՝ ԵԱ-ի եզրափակչում Ամոյանը 7-0 հաշվով վստահ առավելության է հասել աշխարհի բրոնզե մեդալակիր, Եվրոպայի կրկնակի փոխչեմպիոն, թուրք Յունուս Բասարի նկատմամբ։
Մալխաս Ամոյանը պայքարը սկսել էր 1/8 եզրափակչից, որտեղ 10:1 հաշվով տպավորիչ հաղթանակ էր տարել իտալացի Ռիկարդո Վիտո Աբրեսցիայի նկատմամբ: Քառորդ եզրափակչում հայ ըմբիշը 3:2 հաշվով առավելության էր հասել անկախ երկրների դրոշի ներքո հանդես եկող ռուսաստանցի Ադլետ Տյուլուբաևի նկատմամբ, իսկ կիսաեզրափակչում 2։1 հաշվով հաղթել մոլդովացի Ալեքսանդրին Գուտուին:
«Արմսպորտը» նաև ներկայացրել է լուսանկարներ Ամոյանի չեմպիոնական գոտեմարտից և պարգևատրման արարողությունից: