«Կապելով» մյուսների ձեռքերը... Ինչո՞ւ է ՀՀ ՊՆ-ն ամեն գնով հաճոյանում... Ալիևին

Այսօր բոլորիս ուշադրությունը կենտրոնացած է Ներքին Հանդում լուսադեմին կատարված թշնամական ելուզակության ու դրա ծանր հետևանքների վրա: Բայց փետրվարի 12-ին տարածվեց «պաշտպանական գերատեսչության» մեկ այլ հաղորդագրություն, որն ինքն իրենով խիստ ուշագրավ, եթե չասվի՝ տարօրինակ էր: 
Չզլանանք, հիշեցնենք, ՀՀ ՊԻ ֆեյսբուքյան էջում զետեղված հաղորդագրության ակտիվ հղումով ևս. «Ադրբեջանական լրատվամիջոցների տարածած տեղեկատվությունը Հայաստան-Ադրբեջան պետական սահմանի Կապան-Զանգելան հատվածում ս/թ փետրվարի 12-ին հայաստանցի դիրքապահների կողմից կրակ բացելու մասին հետաքննվում է: Վերադաս հրամանատարության կողմից գրավոր հրամաններով հստակ սահմանված են այն դեպքերը, երբ զինծառայողը, իրադրությունը գնահատելով, կարող է եւ/կամ պարտավոր է կրակ բացելու որոշում կայացնել: Նախնական տեղեկատվությամբ փետրվարի 12-ին տվյալ տեղամասում նման իրադրություն առկա չի եղել: Այս հանգամանքը հաստատվելու պարագայում հրամանը խախտելու դեպքի մեղավորները կենթարկվեն պատասխանատվության»: 
Իսկ հաղորդագրության ներքո նշված կամ «ստորագրված» էր՝ ՀՀ ՊՆ ռազմական ոստիկանություն: 
Ինչո՞ւ ենք սա համարում ուշագրավ ու տարօրինակ: Ուշագրավ է այն, որ վերջին տարիներին, չնայած ադրբեջանական կողմի ամենատարբեր հարձակողական, ագրեսիվ գործողություններին, այդ թվում՝ դիվերսիոն ներթափանցման, հայ զինծառայողների գերելու, վիրավորելու, խաղաղ բնակիչ սպանելու դեպքերին, երբեք ադրբեջանական կողմը չի հայտարարել, թե՝ կքննի, կպարզի, մեղավորներին կպատժի, այս այն: Հակառակը, ադրբեջանական իշխանությունները հերոսացնում, որպես օրինակելի են ներկայացնում նման գործողությունների մասնակցածներին: 
Հիմա, մի հայ դիրքապահ կրակել ու վիրավորել է ինչ-որ ադրբեջանական թուրքի: ՀՀ ՊՆ ռազմական ոստիկանության տարածած հաղորդագրության տոնայնությունն այնպիսին է, որ կարելի է կարծել, Ալիևին խոստանում են, որ տվյալ հայ զինվորականին կգնդակահարեն, առնվազն՝ մարմնական վնասվածք պատճառելու հադվածով կդատեն, բանտ կնետեն և այլն: 
Երևի սրանից հետո, օրինակ, փաշինյանական ԿԳՄՍ-ն պետք է պաշտոնապես ներողություն հայտնի թուրքական կողմին... երբ հայ ըմբիշները հաղթում են թուրքերին: Աբսուրդ կլինի, չէ՞: Բայց ՊՆ ռազմական ոստիկանության տարածած պարտվողական, թշնամու առաջ խեղճանալու, այն էլ՝ զոհվածներին անդամահատող, գլխատող, հոշոտող, մեր հայրենիքը զավթած, հակամարդ թշնամու առաջ կախգլուխ նման բաներ ասելը մի՞թե պակաս աբսուրդ է:
Ինչո՞ւ է ՀՀ ՊՆ-ն ամեն գնով կամ նման կերպ հաճոյանում Ալիևին կամ ադրբեջանական կողմին: Որ՝ ի՞նչ: Որ թշնամին ավելի լկտի ու սանձարձակ գործի՞: Դուք առհասարակ «ո՞ւմ կողմից» եք, պարոնայք: 
Դա դեռ մի կողմ: Մյուս կողմից. ի՞նչ հետևություններ են անելու մյուս դիրքապահները, որ կանգնած են թշնամու հրոսակի դեմ-հանդիման: Ամեն կրակելուց առաջ ռազմական ոստիկանությունից հատուկ թույլտվությո՞ւն պիտի հայցեն: Չէ՞ որ հակառակ դեպքում փաշինյանական պաշտոնյաներն ուղղակի օրուարև չեն տա՝ հարցաքննություններով, «գործ» կարելով ու նման բաներով: Հա, բայց մինչև ամեն կոնկրետ իրավիճակում դիրքապահները երկմտեն, թշնամին կկրակի, կխոցի, դիրք կգրավի ու, չկասկածեք, նրան իր երկրի իշխանությունները ոչ մի թթու խոսք չեն ասի: 
Նման իրավիճակում վերոհիշյալ հաղորդագրությունը, ավելի ճիշտ՝ դրանում արտացոլված անընկալելի տրամաբանությունը, պատկերավոր ասած, նշանակում է՝ «կապել» դիրքերում կանգնած մեր զինվորների ձեռքերը: Սա ի՞նչ է, թշնամու վրա չկրակելու քողարկված հրամա՞ն: 
Եվ ինչպես դա «գնահատեց» թշնամի՞ն: 

Արտաշես Արամյան 
Zham.am