Արմեն Մարտիրոսյան. «Սամվել Բաբայանի նկատմամբ քաղաքական դատավճիռ կայացվեց» (Տեսանյութ)

Այստեղ քաղաքական հետագիծ կա, ոչ միայն դատավճիռը, այլ ամբողջ գործընթացը՝ ձերբակալում, կալանավորում, հետագայում դատավարություն և դատավճիռ, քաղաքական է:

Այս մասին «Ազատություն» ռադիոկայանի եթերում ասել է «Ժառանգություն» կուսակցության փոխնախագահ Արմեն Մարտիրոսյանը՝ անդրադառնալով Սամվել Բաբայանի դատավճռին ու ազատազրկմանը:

Նշենք, որ Արցախի հերոս, Արցախի պաշտպանության բանակի նախկին հրամանատար Սամվել Բաբայանը, ով մեղադրվում էր Քրեական օրենսգրքի 38-235-րդ հոդվածի 2-րդ մասի և 190-րդ հոդվածի 1-ին մասի հատկանիշներով, «Իգլայի» գործով մեղավոր է ճանաչվել և դատապարտվել ազատազրկման 6 տարի ժամկետով։

«Այս ամբողջը քաղաքական ենթատեքստ ուներ և քաղաքական ենթատեքստը շատ ավելի է երևում հիմա, քան ընտրական ժամանակահատվածում: Իրականում մենք տեսանք, որ որևէ մեղադրանք չապացուցվեց դատարանում: Սամվել Բաբայանի դեմ մեկ ցուցմունք կար նախաքննություն ընթացքում, բայց այդ անձը դատարանում ասաց, որ իր վրա ճնշումներ են եղել, դրա համար ինքը նմանատիպ նախաքննական ցուցմունքներ է տվել: Այսինքն՝ եթե նորմալ դատարան լիներ, ապա այդ հայտարարությունից անմիջապես հետո դատավորը պետք է որոշում ընդուներ Սամվել Բաբայանին կալանքից ազատ արձակելու մասին, որովհետև եթե այդ մի ցուցմունքն է հիմք ընդունել և դրա ժխտումը եղավ հենց վկայի կողմից, նշանակում է՝ արդեն պետք է ազատ արձակվեր»,-վերլուծել է Արմեն Մարտիրոսյանը:

Նրա խոսքով՝ ինչ վերաբերում է թղթադրամներին, արդեն ուղղակի ծիծաղելի մեղադրանք էր, և, ըստ էության, թղթադրամների հետ կապված որևէ մեկն ազատությունից չզրկվեց, այսինքն՝ ինչ-որ պայմանական դատավճիռ եղավ, ու միայն Սամվել Բաբայանն ազատազրկվեց: Ուստի, այս երկու հանգամանքը հաշվի առնելով, ակնհայտ է, որ որևէ դատավճիռ չպետք է լիներ և որևէ մեկի նկատմամբ:

«Եթե հիշում եք, Սամվել Բաբայանն այն ժամանակ նշեց, որ մարտի 25-ին, թե 27-ին շատ կարևոր հարցազրույց է տալու և շատ բաներ է բացահայտելու, կարծեք թե այդ ամենի դեմն առնելու համար իր նկատմամբ այս գործընթացը սկսվեց: Ակնհայտ է, որ եթե սա քաղաքական չլիներ, ապա Սամվել Բաբայանի նման անձնավորությանն ուղղակի ո՛չ կկալանավորեին, ո՛չ կձերբակալեին, ո՛չ էլ կդատապարտեին»,-ասել է «Ժառանգության« փոխնախագահը:

Նա հիշեցրել է, որ Սամվել Բաբայանը մինչև ձերբակալվելը մի քանի հարցազրույց տվեց, փորձեց ակտիվանալ, Ստեփանակերտ գնաց, այնտեղ Ազատամարտիկների միությունը հայտարարություն ընդունեց, Հայկ Խանումյանին դաժան բռնության ենթարկեցին:

«Ակնհայտ է, որ այդ ամենի պատճառը խորհրդարանական ընտրություններից առաջ իր քաղաքական ակտիվացումն էր, «ՕՐՕ» դաշինքին աջակցությունը: Սամվել Բաբայանի խոսքով՝ «տրուբայի» պատճառով ազատազրկեցին, ամբողջական զենք չէր: Իսկ երեկ գեներալ-լեյտենանտ Գագիկ Մելքոնյանն ասաց, որ այդ «տրուբաների» մասին ամբողջ Հայաստանը գիտեր, դրանք էջմիածինցի չգիտեմ ում ավտոտնակում գցած էին, դրանցից մեկն է: Ըստ էության, այդ խողովակը, որն ընդամենը մի դետալն է զենքի, որի վրա մի ամբողջ քրեական գործ հարուցվեց, և ազատազրկման դատապարտվեց Սամվել Բաբայանը»,-ասել է նա։

Արմեն Մարտիրոսյանի գնահատմամբ՝ ակնհայտ է, որ եթե ոչ քաղաքական, ապա այլ պարագաներում դա տեղի չէր ունենա: Նրա խոսքով՝ բացառապես քաղաքական է նմանատիպ խիստ պատժաչափը, գործողությունն՝ ամբողջությամբ:

«Եվ սա վատ է այն առումով, որ մենք տեսնում ենք, որ Հայաստանում այն մարդիկ, ովքեր որ բառիս բուն իմաստով իրենց կյանքը տվել են Հայաստանի ազատության համար, Հայաստանի անկախության համար, Արցախի համար, այս ժողովրդին հերթական անգամ ցեղասպանությունից փրկելու համար, այդ բոլոր մարդիկ կա՛մ դատապարտված են, կա՛մ դատապարտվել են, կա՛մ էլ դատապարտման են սպասում»,-ասել է նա։