Նիկոլ Փաշինյանը Դանիել Իոաննիսյանի շուրթերով էլ ասաց, թե ինչու են փոխում Սահմանադրությունը (տեսանյութ)

Իլհամ Ալիևը տարիներ առաջ պահանջ էր դրել Նիկոլ Փաշինյանի առաջ՝ փոխել ՀՀ սահմանադրությունը: Պարզ էր, որ դա ՀՀ անկախության հռչակագրից ու մասնավորապես՝ Արցախից պաշտոնապես հրաժարվելու ադրբեջանական նախապայման էր:
2023-ի հայտնի զարգացումների արդյունքում Արցախը հայաթափվեց: Հայերը ենթարկվեցին էթնիկ զտման: Դրանից առաջ՝ 2022թ. հոկտեմբերի 6-ին Պրահայում Նիկոլ Փաշինյանը պաշտոնապես ճանաչել էր Արցախն Ադրբեջանի կազմում: Փաշինյանի այդ որոշումը հնարավորություն տվեց Ալիևին նախ պաշարել Արցախը, ապա գնալ միջազգային հանցագործության:
Եվ ահա այս ամենից հետո Փաշինյանը խոսում է նոր Սահմանադրության ընդունման մասին՝ դա բացատրելով նոր իրողություններով: Այդ նոր իրողություններն Ալիևի նախապայմանի բավարարմանն է վերաբերում:
Սահմանադրական փոփոխությունների, ավելի ճիշտ՝ նոր Սահմանադրության ընդունման հանձնաժողովում ներգրավված է նաև տխրահռչակ Դանիել Իոաննիսյանը, ով Հ1-ի եթերում արդեն ավելի բաց տեքստով հայտարարեց, որ Սահմանադրությունն ուզում են փոխել, որպեսզի Հայաստանը պաշտանապես հրաժարվի Արցախից ու թեման ամբողջությամբ փակի՝ Ադրբեջանի հետ «խաղաղասիրական» ծրագրերից ելնելով: Նոր Սահմանադրությունը նաև Փաշինյանի կողմից 88-ի շարժման գաղափարներից հրաժարում է, ինչը նշանակում է նաև Հայոց ցեղասպանության միջազգային ճանաչման գործընթացից պաշտոնապես հրաժարում, որն արդեն Թուրքիայի նախապայմաններից է:
Սա ևս մեկ անգամ ցույց է տալիս, որ Փաշինյանի կողմից եղել է աջակցություն Ալիևին՝ Արցախի հայաթափման հարցում: Դավաճանությունը պոզով ու պոչո՞վ է լինում:
Պետրոս Ալեքսանյան
7or.am