Եթե Փաշինյանը ջայլամի պես գլուխը թաքցնում է ավազի մեջ, ապա այլևս ավազ չկա, բետոն կա, գլուխը թաքցնելու տեղ չկա․ Ալեքսեյ Անպիլոգով (տեսանյութ)

Alpha Newsroom-ի եթերում ռուս քաղաքագետ Ալեքսեյ Անպիլոգովը մեկնաբանել է Ադրբեջանի նախագահ Իլհամ Ալիևի սպառնալիքները և Նիկոլ Փաշինյանի նոր հայտարարությունները:
«Եթե Փաշինյանը հիմա ջայլամի պես գլուխը թաքցնում է ավազի մեջ, ապա պետք է ասեմ, որ այլևս ավազ չկա, բետոն կա, գլուխը թաքցնելու տեղ չկա։ Ադրբեջանը միշտ հնարավորություն ունի նման պաշտոնական պայմանագրային բազայից վերադառնալ ուժի միջոցով հարցեր լուծելուն, ինչպես դա արեց Արցախի դեպքում»,-ասել է քաղաքագետը։
Ինչ վերաբերում է այսպես կոչված «Զանգեզուրի միջանցքի» վերաբերյալ Ալիևի սպառնալիքներին, ապա փորձագետի կարծիքով՝ Ադրբեջանի նախագահն իր շահերից ելնելով այդ հարցը մինչև վերջ կտանի։
«Սյունիքի մարզն ամբողջությամբ Հայաստանի ինքնիշխան տարածքն է, որն, օրինակ, պարտավորվում է պաշտպանել Հավաքական անվտանգության պայմանագրի կազմակերպությունը։ Բայց Ալիևն այժմ փորձում է թուրքական լծակի միջոցով այդ ամենը հասցնել երկկողմ հարաբերությունների մակարդակի, փաստացի մղել Փաշինյանին առանց Ռուսաստանի մասնակցության, առանց Իրանի ներգրավման, որը միանշանակ դեմ է այդ, այսպես կոչված, «Զանգեզուրի միջանցքին»,-նշել է Անպիլոգովը։
Խոսելով այս հարցում Ռուսաստանի դիրքորոշման մասին՝ քաղաքագետը կարծում է, որ Ռուսաստանն այժմ միանշանակ պնդելու է այն, ինչը տեղ է գտել 2020 թվականի նոյեմբերի 9-ի եռակողմ համաձայնագրում։
«2020 թվականի նոյեմբերի 9-ի եռակողմ համաձայնագրում ամրագրված է, որ Հայաստանը պահպանում է ինքնիշխանությունը Սյունիքի մարզի նկատմամբ՝ ապահովելով բեռների երթևեկության անվտանգությունը»,-ընդգծել է Անպիլոգովը:
Միևնույն ժամանակ, փորձագետի հետ քննարկվել է Փաշինյանի հայտարարությունն այն մասին, որ այն գործողությունները, որոնք ձեռնարկվել են Լեռնային Ղարաբաղում Ադրբեջանի և Ռուսաստանի կողմից, վկայում են այն մասին, որ 2020 թվականի նոյեմբերի 9-ի փաստաթուղթը գոյություն չունի, Ադրբեջանին զենքի փոխադարձ վերահսկողության մեխանիզմ ստեղծելու առաջարկը, ինչպես նաև Ռուսաստանի և Հայաստանի հարաբերություններն այսօր։