Կա՞ մի բան, որ դուք պատրաստ եք չզիջել և կա՞ մի բան, որ պատրաստ է զիջել Ալիևը. Աննա Գրիգորյանը՝ Փաշինյանին (տեսանյութ)

Նախընտրական խոստումներում նշվում էր «անջատում հանուն փրկության» թեզի մասին, իսկ բանակցություններում այս կառավարությունը որդեգրել էր «հանձնենք Արցախը, ստանանք կադաստրի վկայական, ապահովենք 29800-ը»: Այս մասին այսօր՝ հունվարի 17-ին, ԱԺ-ում հարցուպատասխանի ժամանակ նշեց «Հայաստան» խմբակցության պատգամավոր Աննա Գրիգորյանը:
Նա դիմելով Նիկոլ Փաշինյանին՝ ասաց. «Զոհաբերեցիք Արցախը, ադրբեջանական ուժերը շարունակում են մնալ Ջերմուկում, Ներքին Հանդում եւ մնացած օկուպացված հատվածներում: Հետո էլ ասում էիք՝ խաղաղությունը շատ մոտ է, հիմա կգնանք, կկնքենք պայմանագիր, նաեւ ասում էիք՝ երեք սկզբունքների շուրջ ձեռք եք բերել համաձայնություն՝ տարածքային ամբողջականություն, սահմանազատման մասին սկզբունքներ եւ կոմունիկացիաների ապաշրջափակում: Բայց հիմա Ալիեւն ասում է՝ որտեղ կանգնել եմ, ընդհանրապես չեմ պատրաստվում դուրս գալ: Ալիեւը պահանջներ է ներկայացնում, որեւէ կետում զիջման չի գնում, դուք բոլոր այն հարցերը, որոնք համարում էիք կարմիր գեր, բոլորը զիջել եք: Սահմանազատման շուրջ որեւէ սկզբունքի վերաբերյալ համաձայնություն չկա, ապաշրջափակման մասին խոսք չկա: Դուք զիջում եք ամեն ինչ, Ալիեւը չի զիջում ոչինչ: Ցույց տվեք մի կետ, որտեղ պատրաստ եք մինչեւ վերջ կանգնել ու չզիջել, եւ ցույց տվեք մի կետ, որտեղ Ալիեւը պատրաստ է գնալ զիջման»:

Ի պատասխան վարչապետն ասաց. «Ես պաշտոնական Բաքվից հնչող հայտարարություններին արձագանքել եմ ամբողջական, արձագանքեցի նաեւ այսօր այստեղ, դրան ավելացնելու բան չունեմ: Աին, ինչ ասում եք՝ իրականությանը չի համապատասխանում: Ուրիշ բան, որ դուք ուզում եք, որ այդպես լինի, որովհետեւ այդպես լինելու հույսն է ապահովում ձեր քաղաքական գոյությունը, եթե դա կա որպես իրողություն:
Ինչ վերաբերում է Ադրբեջանին, 1991-ից ոչ մի վայրկյան Ադրբեջանը պատրաստ չի եղել զիջել»:
Այս մասին հաղորդում է News.am-ը
Փոխարենը հանրահայտ է, որ 1991-ից էլ, 1996-ից էլ, ու դրանից հետո էլ, առավել ևս՝ 2018-ից էլ, 2020-ից էլ, 2022-ից էլ Նիկոլ Փաշինյանն ու փաշինյանականները մշտապես պատրաստ են զիջել, զիջել, տալ, հանձնել ու զիջում են, տալիս են, հանձնում: Խոսքը երկրի, հողերի, գյուղերի, հայրենիքի մասին է: Միակ բանը, որ նրանք չեն զիջի, իշխանությունն է: