Մահացել է աշխարհահռչակ գերմանացի ֆուտբոլիստ, լեգենդար Ֆրանց Բեկենբաուերը

Գերմանիայում, 78 տարեկան հասակում մահկանացուն է կնքել հանրահայտ ֆուտբոլիստ, Աշխարհի (1974թ.) ու Եվրոպայի (1972թ.) չեմպիոն, «Բավարիայի» լեգենդար պաշտպան Ֆրանց Բեկենբաուերը: Բազմատիտղոսակիր Բեկենբաուերը, ում ժամանակին մարզական մեկնաբանները կնքել էին որպես «կայզեր Ֆրանց», այն եզակի մասնագետներից է, որ նաև որպես մարզիչ է դարձել Աշխարհի չեմպիոն: Մասնավորապես, 1990 թվականին նրա գլխավորած Գերմանիայի հավաքականը նվաճեց Աշխարհի չեմպիոնի տիտղոսը: 
Ֆրանց Բեկենբաուերը, իր ֆուտբոլային կարիերայի ծաղկման ամենավառ հատվածում, երբ Եվրոպայի ու Աշխարհի չեմպիոն էր, «Բավարիայի» ավագը, իրեն դրսևորելու հնարավորություն է ունեցել նաև Երևանում՝ «Հրազդան» մարզադաշտում: 
Տեղի է ունեցել դա 1975 թվականի մարտի 19-ին, Եվրոպական չեմպինների գավաթի (ներկայումս՝ Չեմպիոնների լիգա) խաղարկության 1/4 եզրափակչի պատասխան հանդիպման ժամանակ: Այդ պատմական խաղում Երևանի «Արարատը», 35-րդ րոպեին Արկադի Անդրեասյանի խփած գոլի շնորհիվ, հաղթեց «Բավարիային», սակայն դա բավարար չէր՝ հաջորդ փուլ անցնելու համար: Եվ ամեն դեպքում, շատերը մինչև հիմա հիշում են այդ հանդիպումը, որտեղ «Արարատի» ֆուտբոլիստները հաղթեցին 90 տոկոսով Աշխարհի չեմպիոններից կազմված «Բավարիային»:
Սա գիտեն շատերը: Բայց թերևս քչերը կիմանան, որ Ֆրանց Բեկենբաուերը նաև 1989 թվականի մարտին, Աուգսբուրգում մասնակցել է ԽՍՀՄ-ի ու Եվրոպայի վետերան ֆուտբոլիստների հավաքականների բարեգործական հանդիպմանը, որի ամբողջ հասույթը տրամադրվել է Սպիտակի երկրաշարժից տուժածներին օգնելու համար: 
Լուսանկարում՝ «Արարատի» լեգենդար ավագ, երջանկահիշատակ Հովհաննես Զանազանյանը և «Բավարիայի» ավագ Ֆրանց Բեկենբաուերը՝ 1975 թվականի երևանյան հանդիպման մեկնարկային ողջույնի ժամանակ:  

Zham.am