Աշոտյանի հետ անհաշտ հակառակորդներ ենք, բայց դա չի նշանակում, որ մենք թույլ կտանք վիշապ սպանողին դառնալ վիշապ. Զուրաբյան (տեսանյութ)

Մենք Արմեն Աշոտյանի հետ անհաշտ հակառակորդներ ենք, բայց դա չի նշանակում, որ մենք թույլ կտանք վիշապ սպանողին դառնալ վիշապ: Այս մասին, այսօր՝ հունվարի 8-ին, դատարանի մոտ լրագրողների հետ զրույցում նշեց ՀԱԿ փոխնախագահ Լեւոն Զուրաբյանը, ով եւս ՀՀԿ փոխնախագահ Արմեն Աշոտյանի կալանքը փոխելու միջնորդության համար երաշխավորություն էր ներկայացրել։
«Այս գործը Եվրոպական դատարանում պայթելու է: Ես բերեցի ԵԽԽՎ-ում ընդունված 1900 համարով ընդունված բանաձեւի չափանիշները քաղբանտարկյալի սահմանման մասին: Այս գործը հստակ անցնում է այդ չափանիշներից մեկի ներքո եւ Արմեն Աշոտյանը շատ հստակ քաղբանտարկյալ է»,-ասաց Զուրաբյանը:
Նրա խոսքով, երբ նոյեմբերի 23-ին եղավ ՔՊ-ի համաժողովը եւ որոշվեց ամենուրեք ընդդիմադիր մարդկանցից իշխանությունը խլել, եւ անցան գործի, իրենք հասկացան, որ սա համակարգված գրոհ է ժողովրդավարական ինստիտուտների վրա:
«Իրավապահ համակարգն օգտագործվում է ապօրինաբար իրենց իշխանությունն ուժեղացնելու, հակառակորդներին ոչնչացնելու, լռեցնելու նպատակով: Բազմաթիվ թալանչիներից ո՞վ է նստած բանտում, ո՞ւր են այդ մարդիկ: Ու պետք է գային Աշոտյանի վրա՞ կոտրեին էս բանը: Փաշինյանը կոռուպցիայի հարց է լուծո՞ւմ, թե՞ Աշոտյանին լռեցնելու հարց»,-ասաց Զորաբյանը:
Նա ընդգծեց, որ Նիկոլ Փաշինյանն սկսել է անցնել «կարմիր գծերը» ժողովրդավարական նորմերի դեմ. «Հիմա հանրությունից է կախված՝ թույլ կտա՞ անցնել այդ մարմիր գծերը, թե՞ թույլ չի տա: Սա ընդամենը մի դրվագ է: Հիմա հետ հոկտեմբերքսանյոթյան ռեժիմի հանդեպ ատելությունը փորձում են շահարկել ոչ թե կոնկրետ հանցագործությունների համար մեղավորներին պատժելու, այլ իրենց իշխանությունը հավերժացնելու նպատակով: Սա անթույլատրելի է»:
Մանրաման՝ տեսանյութում:
Աղբյուր՝ News.am