Նիկոլի «Հանրային հեռուստաընկերությունը» թշնամական վերաբերմունք է դրսևորել Հայ Առաքելական եկեղեցու դեմ

Փաշինյանական իշխանությունն ինքն «ինքը չէր լինի», եթե առանց այն էլ կորուստներով  ապականած Ամանորը մի հատ էլ լրացուցիչ չհարամեր: Մասնավորապես, իր լրումն մյուս բոլոր այլանդակությունների, հիմա էլ այսպես կոչված «Հանրային հեռուստաընկերությունը» խայտառակ ու աններելի, թշնամական ու ցածր վարք է դրսևորել Ամենայն Հայոց կաթողիկոսի, նույնն է, թե՝ Հայ Առաքելական եկեղեցու և ընդհանրապես հայ ազգի նկատմամբ: Այդ «հեռուստաընկերությունը» հրաժարվել է եթեր հեռարձակել Ամենայն Հայոց կաթողիկոսի ուղերձը: 

Ու, իրենց մակարդակին հարիր, իբր որպես «լավություն», առաջարկել են կաթողիկոսի ուղերձը հեռարձակել ոչ թե երկրի ղեկավարի ուղերձից առաջ, այլ այնպես՝ ինչ-որ լուրերի թողարկման մեջ: Սա իսկապես աննախադեպ է, ի լրումն՝ ծայրահեղ անհարգալից վերաբերմունքի ցուցադրական ու նպատակային դրսևորում: Պարզ ասած՝ թշնամություն է: 

Այս խայտառակության վերաբերյալ Մայր Աթոռ Սուրբ Էջմիածինը քիչ առաջ տարածել է հետևյալ պարզաբանումը. «Ցավոք, Ամանորի այս երեկո ստիպված պիտի լինենք անդրադառնալ տհաճ մի միջադեպի։
Անկախության պատմության ողջ ընթացքում, դեռևս Վազգեն Ա Հայրապետի ժամանակաշրջանից, ավանդաբար Հանրային հեռուստաընկերության եթերով Ամանորի գիշերը երկրի ղեկավարի ուղերձից անմիջապես առաջ հեռարձակվում էր Ազգիս Վեհափառ Հայրապետի ուղերձը։
Այս տարի Հանրային հեռուստաընկերությունը, վերջին պահին, առանց որևէ պատճառաբանության տեղեկացրեց, որ Վեհափառ Հայրապետի ամանորյա ուղերձը եթեր չի հեռարձակվի կեսգիշերից առաջ, ինչպես և ավանդաբար ընդունված էր։ Փոխարենն առաջարկվեց Ամենայն Հայոց Հայրապետի ուղերձը ներկայացնել Լուրերի երեկոյան թողարկման ընթացքում, ինչը Մայր Աթոռի կողմից պատշաճ չնկատվեց և մերժվեց։
Մնացած բոլոր մեղադրանքներն ու վերագրումները հերյուրանք են, իսկ նման որոշման պատճառների վերաբերյալ հարկ է դիմել Հանրային հեռուստաընկերությանը»։