Տարվա չարիքը. Նիկոլ Փաշինյանի պաշտոնավարում

Տարվա օրացուցային ավարտին ընդունված է «ամփոփել արդյունքները»: Բայց դա նորմալ երկրներում, որտեղ կան քիչ թե շատ խելքը գլխին կառավարություններ, որոնք առնվազն չեն սպասարկում թշնամիների շահերը, ինչպես մեր դեպքում է: Ու առհասարակ, ամփոփելու համար արդյունքներ են պետք, իսկ մերը շարունակական կորուստներ են, աղետներ, անկումներ: Այնպես որ, ամփոփելու բան չկա, առավելագույնը, կարելի է հաշվել կորուստները, բայց դրանք էլ անչափելի են: Օրինակ, հնարավո՞ր է չափել կամ հաշվել հայրենազրկումը, հնարավո՞ր է ամփոփել Արցախի հայաթափումը:
Այսուհանդերձ, եթե ի մի բերենք, ապա անցնող 2023-ի գլխավոր չարիքը Նիկոլ Փաշինյանի պաշտոնավարումն է: Համարձակորեն կարելի է ասել, որ դա վերջին հնգամյակի չարիքն է: Բայց դրանից իրականությունը պակաս եղերական չի դառնում:
Իսկ գլխավոր չարիքը Նիկոլ Փաշինյանի պաշտոնավարումն է այն պարզ պատճառով, որ Հայաստանի ու հայության մյուս բոլոր քաղաքական, իրավական, տնտեսական, տարածքային, անվտանգային ձախողումներն ու կորուստներն ուղղակիորեն ածանցված են այդ իրողությունից: Ի դեպ, առնվազն Երևանի ավագանու ընտրություններն ի ցույց դրեցին, թե որքան ցածր է Փաշինյանի իշխանության այսպես ասենք՝ վարկանիշը:
Եվ, քանի որ ընդամենը «տարին ենք փակում», կարճ կապենք, մաղթելով ինքներս մեզ ու մեր հայրենակիցներին, որ գալիք 2024 «Վիշապի տարում» այդ չարիքից վերջապես ձերբազատվենք:
Ի դեպ, Փաշինյանի կառավարությունը անցնող տարվա փետրվարին հապշտապ մարդասիրական օգնություն ուղարկեց ավերիչ երկրաշարժից տուժած Թուրքիա, այն դեպքում, եր Թուրքիայի իշխանությունը բացեիբաց խրախուսում էր Ադրբեջանի կողմից Արցախի տոտալ շրջափակումը, հայերի սպանությունները, երեխաներին սովահար անելը, խաղաղ բնակիչների սպանությունները: Փաշինյանի թիմի ներկայացուցիչ, նրա ԱԳ նախարար Միրզոյանն անձամբ մեկնեց Թուրքիա և շատ ուրախ ու հպարտ էր, որ հայերին կոտորող թուրքական իշխանությանն օգնություն է տարել: 
Ավելին, Փաշինյանը հունիսին վազելով մեկնեց Թուրքիա՝ Էրդողանի երդմնակալությանը ներկա գտնվելու համար, որտեղ նրան ուղղակիորեն ու ցուցադրաբար արհամարհեցին, Էրդողանն անգամ նրա անունը չնշեց իր ելույթում:
Ա.Հակոբյան
Zham.am