Պյոտր Սվիտալսկի. Մենք հավատում ենք ԼՂ հակամարտության խաղաղ կարգավորմանը
Հայաստան-ԵՄ համաձայնագիրը պարունակում է հստակ հայտարարություն ԼՂ հարցի կարգավորման ուղղությամբ: Նոյեմբերի 27-ին լրագրողների հետ հանդիպմանը այս մասին նշեց Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին, խոսելով համաձայնագրի ստորագրման՝ ԼՂ խնդրի կարգավորման գործընթացի վրա հնարավոր ազդեցության մասին:
Նրա խոսքով՝ եվրոպական դիրքորոշումը հստակ է. ԵՄ-ն ամբողջապես արտահայտվում է ի նպաստ խաղաղ կարգավորման, սատարում կամ կողմնակից է Մինսկի խմբի և համանախագահների աշխատանքներին, պատրաստ է նպաստել՝ շատ հստակ աջակցություն տրամադրելով վստահության կառուցման գործընթացին, ինչպես նաև հետհակամարտության շրջանի վերականգնողական գործողություններին:
«Մենք հավատում ենք այս հակամարտության խաղաղ կարգավորմանը, դա կարևոր է Հայաստանի և ամբողջ տարածաշրջանի զարգացման, բացի այդ, Եվրոպական հարևանության կայունության իմաստով: Այն ձևակերպումները, որոնք կան համաձայնագրում, ես կարծում եմ՝ արտացոլում են ԵՄ և Հայաստանի միջև ընդհանուր հայտարարի՝ շատ բարձր մակարդակի լինելը»,- ասաց նա:
Նա նաեւ նշեց, որ ՀՀ-ԵՄ Համապարփակ և ընդլայնված գործընկերության համաձայնագրից բխող գործողությունների իրականացումն ապահովելու համար:
«Ես և պատվիրակության մեր գործընկերները պատրաստ ենք անելու առավելագույնը համաձայնագրի իրականացման համար: Այս համաձայնագիրը նոր հնարավորություններ ու դռներ է բացում, բայց ամենաէականը դրա լավ իրականացման ապահովմամբ՝ օգուտ ստանալն է: Դրա համար մենք յուրաքանչյուրս մեր դերակատարմամբ լծված ենք կատարելու համաձայնագրից բխող կետերը»,-ասաց ԵՄ պաշտոնյան:
Նա հավելեց, որ ակտիվացնելու են իրենց ջանքերը ՀՀ զարգացման գործում, որպեսզի հասարակ քաղաքացիների համար տեսանելի ու ճանաչելի դառնա համաձայնագրի կարևորությունը: «Համաձայնագիրը չի պարունակում որևէ կախարդական փայտիկ, որը մի գիշերվա մեջ ամեն ինչ կփոխի: Բայց այն առաջ կբերի շոշափելի բարելավումներ սովորական քաղաքացու տեսանկյունից»,-ավելացրեց Պյոտր Սվիտալսկին:
Zham.am
Լուսանկարը եւ տեսանյութը՝ Մեդիա կենտրոն-ի:
Հետևեք մեզ Facebook-ում