Ինչպես կանխել նիկոլական ֆինանսական ահաբեկչությունը

Նիկոլ Փաշինյանի թիմակիցները քաղաքապետարանում որոշել են ժողովրդից 7 կաշի քերթել: Խոսքը միայն կարմիր կետագծերով ավտոկայանատեղիների գների կտրուկ՝ ավելի քան 13 անգամ թանկացման մասին չէ:
Ըստ «Քաղաքացիական պայմանագիր» կուսակցության՝ ՔՊԿ-ի ու «Հանրապետություն» խմբակի ձևավորած կոալիցիայի՝ պետք է թանկացնել Օպերայի շենքի տակի ավտոկայանատեղիների գները ևս: 1 ժամն այստեղ հիմա արժե 200 դրամ, ուզում են դարձնել 300 դրամ: Իսկ նույն այդ կայանատեղիում գիշերվա վարձը կթանկանա 5 անգամ՝ դառնալով 2.500 դրամ (ժամը 24:00-ից մինչև 09:00): Այդտեղ կթանկանան նաև ամսական աբոնեմենտային վճարները:
ՔՊԿ-ն ու Արամ Զավենովնան նախատեսել են կտրուկ ավելացնել նաև տեղական տուրքերն ու վճարները: Դա վերաբերելու է շինարարությանը, հանրային սննդի կազմակերպմանը և այլ ոլորտներին:
Ուշագրավն այն է, որ Նիկոլ Փաշինյանի դրածո Տիգրան Ավինյանի ախորժակը բացվել է բոլոր ուղղություններով, սակայն «աչքաթող» են արվել շահումով խաղերով զբաղվողները. Նրանց հարկային բեռը չի ավելանա: Դե երևի որպես փոխհատուցում իշխանամետ ֆեյքային բրիգադներ բուծելու և իշխանական նեչկայացուցիչներին միկոնոսներում տժժացնելու համար:
Այս ամենի արդյունքում մենք ստանալու ենք թանկացումներ: Քաղաքացին դառնալու է թալանի մատերիալ: Որպեսզի կանխվի այս ամենը, անհրաժեշտ է տապալել այդ նախագծերի ընդունումը: Իսկ տապալման համար անհրաժեշտ է որպեսզի Երևանի ավագանու նիստը չկայանա: Նիստը չկայանալու համար անհրաժեշտ է, որպեսզի «Մայր Հայաստանը», «Ազգային առաջընթացը» և էն մյուս խմբակցությունը, որը ֆորմալ առումով հանդես է գալիս որպես ոչ իշխանական, չմասնակցեն նիստին: Եթե այս երեք խմբակցությունները նիստին չմասնակցեն, ապա ավագանու նիստի քվորումը չի ապահովվի և տեղական վճարների ավելացման նախագծերը կտապալվեն ու ՀՀ քաղաքացիները տեռորի չեն ենթարկվի նիկոլական իշխանության կողմից:
Այս պահին Երևանում իշխող կոալիցիան ունի 32 քվե, իսկ ոչ իշխանական ուժերը ավագանու նիստում կարող են ունենալ առավելագույնը 31 քվե, քանզի «Հանրային ձայնից» երկու հոգի չեն կարող մասնակցել նիստերի: Դա նշանակում է, որ ՔՊԿ+«Հանրապետությունն» ունեն ձայների առավելություն, սակայն երկուսով չեն կարող քվորում ապահովել: Ասել է թե՝ մյուս երեք խմբակցությունների հիմնական գործիքն այս իշխանությունների սանձարձակությունների դեմն առնելու համար՝ քվորում չապահովելն է:
«Մայր Հայաստանն» արդեն հայտարարել է, որ դեմ է տեղական վճարների ավելացմանը և ներկայացրել փաստարկված հիմնավորումներ: Մյուսների մասով ամեն ինչ պարզ կդառնա առաջիկա օրերին:
Հայկ Ուսունց