Երդմնակալությունից հետո շքերթի ժամանակ Արգենտինայի նոր նախագահի վրա շիշ են նետել (տեսանյութ)

Արգենտինայի նոր նախագահ Խավիեր Մայլիի վրա շիշ են նետել Կոնգրեսում երդվելուց հետո իր մեքենան նստելիս, հայտնում է La Nation-ը։

Ամբոխի միջից մի տղամարդու նետված ապակե շիշը մի քանի սանտիմետր հեռավորությամբ թռել է նախագահի գլխի կողքով և հարվածել նրա անվտանգության աշխատակցի գլխին։ Աշխատակիցը պարանոցի փոքր կտրվածք է ստացել և նրան օգնություն են ցուցաբերել պետության ղեկավարի նստավայրի` Կասա Ռոսադայի բժիշկները:

Միջադեպից մի քանի րոպե անց Մայլին խնդրել է կանգնեցնել մեքենան, որով ինքը գնում էր համագումարից դեպի նստավայր, որպեսզի կարողանա դուրս գալ ու ողջունել փողոցում հավաքվածներին։ Casa Rosada-ի մոտ նա նույնպես դուրս է եկել մեքենայից՝ շոյելու ոսկե ռետրիվեր շանը։

Շուտով ոստիկանությունը բացահայտել է հարձակվողին. Պարզվել է, որ նա 51-ամյա նախկին պաշտոնյա է Կոնսեպսիոն դել Ուրուգվայի քաղաքից՝ Գաստոն Արիել Մերկանզինի անունով: Դատարանը նրան կալանավորելու որոշում է կայացրել։

Մայլին հաղթել է Արգենտինայի նախագահական ընտրություններում նոյեմբերին։ Նա հավաքել է 56%, իսկ նրա մրցակից, այն ժամանակվա իշխող կոալիցիայի թեկնածուն և էկոնոմիկայի նախարար Սերխիո Մասսան՝ 44%:

Աղբյուրը՝ news.am

Տեսանյութը՝ հետևյալ հղումով 
https://www.dailymail.co.uk/news/article-12850595/Shocking-moment-Argentine-President-Milei-nearly-struck-head-bottle-second-video-shows-attacker-throwing-disappearing-crowd.html?ico=embedded