«Bastion»-շոուն կփրկի՞ «Ժողովրդավարության բաստիոնին»․ Բոլթոնի պլանի եզրափակիչ փուլը

7or.am-ը գրում է, որ Նիկոլ Փաշինյանը կետ առ կետ կատարում է իր դրսի տերերի առաջադրանքը։ Այն ձևակերպել էր ԱՄՆ նախագահի նախկին խորհրդական Ջոն Բոլթոնը։ Այդ կետերն են՝

• Արցախի հանձնում Ադրբեջանին,
• Հայոց ցեղասպանության հարցի մոռացություն,
• Հայ–իրանական ընդհանուր սահմանի վերացում,
• Հայ–ռուսական հարաբերությունների զրոյացում՝ ՀԱՊԿ–ից, ԵԱՏՄ–ից, ԱՊՀ–ից դուրս գալու և Գյումրիում ռուսական 102–րդ ռազմաբազայի գործունեությունը դադարեցնելու տարբերակով (Սահակաշվիլին պարբերաբար հիշեցնում է Բոլթոնի պլանի այս մի կետի մասին),
• Հայաստանի ներառում թուրքական ազդեցության տակ։

Եթե կարճ ձևակերպենք, ապա Բոլթոնի պլանը Հայաստանի վերացման մասին է։ Հայաստանն, ըստ Բոլթոնի, պետք է դրվի հակառուսական աշխարհաքաղաքական գործընթացների զոհասեղանին։
Նկատենք, որ Բոլթոնի պլանի կետերի մի մասն արդեն կատարվել են։ Մյուս մասն ընթացքի մեջ է։ Հիմա Նիկոլը կենտրոնացել է հայ–ռուսական և հայ–իրանական հարաբերությունների փչացման վրա։ Նա փլուզում է ՀՀ անվտանգության համակարգը։ Ու որպեսզի ՀՀ քաղաքացիների մի մասի աչքերին թոզ փչեն ու խաբեն, առաջ են բերել «Արևմուտքը մեզ կօգնի» բենդերական թեզը։ Ըստ այդ թեզի՝ ՀՀ անվտանգության երաշխավորը կարող է դառնալ Արևմուտքը։ Թեև վերջինս նման բան չի ասել ու նման երաշխիքներ չի տվել։
Ինչ մնում է թոզփչոցիին, ապա դրանցից մեկը ֆրանսիական «նավերն» են՝ «Bastion» զրահամեքենա կոչվածները։ Ասում են 50 զրահամեքենա են ուղարկելու Հայաստան (Արևմուտքից քցված ուկրաինացիք չեն ուզում դրանք, քանզի գիտեն, որ անունն է զրահամեքենա, բայց տակը բան չկա)։ Դրանք մի քիչ ծանր ու մի քիչ էլ բրուտալ տեսք ունեցող ամենագնացներ են, ոչ ավելին։ Ապակեպատ զրահամեքնենան, բնականաբար, ոչ մի բան չի փոխելու մեզ համար ու անվտանգություն չի ապահովելու, բայց շոուն իրականացվում է, որպեսզի ցույց տան, թե, իբր, անվտանգության հարցերով զբաղվում են։
Նիկոլենք Արևմուտքի թեման շրջանառության մեջ են դրել, որպեսզի թաքցնեն թուրքական ականջները։ Իրականում խնդիր է դրված Հայաստանը մտցնել Թուրքիայի տակ։
Արևմուտքի համար կարևորը հակառուսական ու հակաիրանական քաղաքականության իրականացումն է, Հայաստանից ՌԴ հեռացումն ու Հայաստանը հակաիրանական պլացդարմ սարքելը։ Իսկ թե ինչ կլինի դրա արդյունքում Հայաստանի հետ, իրենց չի հետաքրքրում։ Այնպես, ինչպես Արցախի կորուստը նրանց չհետաքրքրեց ու չհուզեց։ Ու չէր էլ հուզելու, քանզի եթե ՀՀ վարչապետի աթոռը զբաղեցնողն է Արցախը հանձնում, ապա ինչո՞ւ պետք է Արևմուտքը հայերից ավելի հայ լինի ու մտահոգվի Արցախի հարցով։ Նույն տարբերակով էլ նրանք Հայաստանին են մոտենում։
Եթե Նիկոլ Փաշինյանն իր անձնական անվտանգության երաշխիքների ստացման դիմաց աճուրդի է հանել ՀՀ անվտանգությունը, ապա դա պետք է մտահոգի ՀՀ քաղաքացիներին, այլ ոչ թե Արևմուտքին, Ռուսաստանին, Իրանին կամ մյուսներին։
Դե իսկ Թուրքիան ու Ադրբեջանն ատամները սրած սպասում են Նիկոլ Փաշինյանի վերջին արարին։ Ինչի՞ է սպասում հայ ժողովուրդը։ Հարցն ամենևին էլ հռետորական չէ։

Պետրոս Ալեքսանյան