Բանականությունից հեռացած Հայաստանում արհեստական բանականության սուպերհամակարգչային կենտրոն կստեղծվի

Հայաստանում կստեղծվի Արհեստական բանականության սուպերհամակարգչային կենտրոն։ Կենտրոնի ստեղծման ֆինանսավորումը կկազմի 3,5 մլրդ ՀՀ դրամ (շուրջ 8,5 մլն ԱՄՆ դոլար)։ Ինչպես հաղորդում է hraparak.am-ը ԱԺ փոխնախագահ Հակոբ Արշակյանը հայտարարել է, որ այն առաջինը կլինի մեր տարածաշրջանում և հիմնված է ամենաժամանակակից տեխնոլոգիաների վրա։
«Այս ծրագիրը ՀՀ վարչապետ Նիկոլ Փաշինյանի և «NVIDIA» ընկերության հիմնադիր և գործադիր տնօրեն Ջենսեն Հուանգի՝ ապիլի 21-ին Երևանում տեղի ունեցած հանդիպմանն արձանագրված առաջնահերթության իրականացումն է։
Որպես ԱԺ նախագահի տեղակալ՝ Արհեստական բանականության սուպերհամակարգչային կենտրոնի ծրագիրն առաջարկել եմ ընդունել 2024 բյուջեի մասին օրենքի նախագծում, որը քիչ առաջ հաստատվեց կառավարության նիստում և շուտով կքննարկվի Ազգային ժողովում։ Ցանկանում եմ շնորհակալություն հայտնել բոլոր այն անձանց, գիտնականներին, ձեռներեցներին, պետական պաշտոնյաներին, ովքեր մասնակցեցին ծրագրի նախապատրաստական աշխատանքներին»,- նշել է նա։
--
Մեր կողմից հավելենք, որ բանականությունից հեռացած Հայաստանում «արհեստական բանականության սուպերհամակարգչային կենտրոնը հենց այն է, ինչ պետք է: Հաշվի առնելով, որ գործող իշխանությանն ամենից շատ հուզում են քաղաքական գործիչների, առհասարակ, բոլորի գաղտնալսման հարցերը, այդ կենտրոնը թերևս թույլ կտա «արևածաղկի սերմ չրթելու» նման լուծել նշված խնդիրը: Հաշվի առնելով կառավարող թիմի տեսակը՝ կարելի է չբացառել, որ կարող է նաև համատարած չիպավորման նախաձեռնություն էլ դրսևորել: 

--
Լուսանկարային կոլլաժը՝ Zham.am-ի