Քիսինջերն էլ գնաց՝ հասցնելով տեսնել աշխարհակարգի փլուզման սկիզբը

Ամերիկացի հայտնի պետական գործիչ Հենրի Քիսինջերը 100 տարեկանում մահկանացուն է կնքել: Ինչպես հաղորդում է «Ազատություն» ռադիոկայանը, ԱՄՆ նախկին պետքարտուղարը մահացել է երեկ, ինչի մասին հաղորդել է նրա խորհրդատվական ընկերությունը: 
Քիսինջերը 1938 թվականին նացիստական Գերմանիայից Միացյալ Նահանգներ փախուստի դիմած հրեաների ընտանիքից էր, Հարվարդի համալսարանի շրջանավարտ: Հանրապետական Քիսինջերն ամերիկյան դիվանագիտական գերատեսչությունը ղեկավարել է 1973-1977 թվականներին՝ նախագահներ Ռիչարդ Նիքսոնի և Ջերալդ Ֆորդի օրոք, ավելի վաղ եղել է Ազգային անվտանգության խորհրդի խորհրդական, 2002-2003 թվականներին նախագահել է «Սեպտեմբերի 11»-ի հանձնաժողովը:
Հենրի Քիսինջերը ղեկավարել է ամերիկյան արտաքին քաղաքականությունը Վիետնամից ԱՄՆ զորքերը դուրս բերելու և Չինաստանի հետ Միացյալ Նահանգների հարաբերություններում առկա անջրպետները վերացնելու ժամանակաշրջանում, նաև Խորհրդային Միության հետ հարաբերությունների լիցքաթափման քաղաքականության նախաձեռնողներից է: 1973 թվականին արժանացել է Խաղաղության Նոբելյան մրցանակի:
Կարելի է հավելել, որ Հենրի Քիսինջերն այնուամենայնիվ հասցրեց տեսնել այդ թվում իր անմիջական մասնակցությամբ ձևավորված աշխարհակարգի փլուզման (զուգահեռ՝ նորի ձևավորման) սկիզբը: