Արագածոտնում 600-ից ավելի ավտոմեքենա մերկասառույցի պատճառով չի կարողանում առաջ ընթանալ (տեսանյութ)

Նոյեմբերի 20-ին հանրապետության գրեթե ողջ տարածքում տեղաց առատ ձյուն, ինչի կապակցությամբ ՆԳՆ ենթակա ծառայությունները՝ Ոստիկանությունն ու Փրկարար ծառայությունը, հանրապետության ճանապարհներին անցան ուժեղացված ծառայության։ Կոտայքի, Գեղարքունիքի, Տավուշի, Լոռու, Շիրակի, Արագածոտնի, Վայոց ձորի և Սյունիքի մարզերի ճանապարհներին պարեկներն ու փրկարարները արգելափակումից դուրս են բերել մեքենաներ, խափանված տրանսպորտային միջոցների վարորդներին և ուղևորներին ցուցաբերել են առաջին օգնություն։
Ներքին գործերի նախարարությունը կոչ է անում բոլոր վարորդներին երթևեկել բացառապես ձմեռային անվադողերով և պահպանել ճանապարհային երթևեկության կանոնները։
shamshyan.com-ը գրում է, որ նոյեմբերի 21-ին արտակարգ իրավիճակ է ստեղծվել Արագածոտնի մարզից դեպի Լոռու մարզ տանող ճանապարհին: Նիգավան բնակավայրից մինչև Վանաձոր ճանապարհահատվածին մերկասառույց է, ինչի պատճառով էլ երթևեկությունը կարելի է ասել Նիգավանից մինչև Սպիտակի ոլորաններ կանգնած վիճակում է: Մոտ 600-ից ավելի ավտոմեքենաներ, այդ թվում՝ բեռնատարներ, ճանապարհի մերկասառույցի պատճառով չեն կարողանում ընթանալ:
100-ից ավելի ավտոմեքենաներ մեծ դժվարությամբ դուրս են բերվել անվտանգ վայր։ Երթևեկությունը մոտ 4 կմ-անոց ճանապարհահատվածում ահավոր վիճակում է գտնվում։ 
Մեր կողմից նկատենք, որ «առատ ձյան» պահը մի փոքր այն չէ: Առհասարակ, «առատ ձյունը» չափման միավոր չէ, դա գեղարվեստական արտահայտություն է: Կոնկրետ քանի՞ միլիմետր տեղումներ են եղել: Հազիվ թե՝ ձյան մետրանոց ծածկույթ է գոյացել: Հարցն այն է, թե  ի՞նչ որակի է ճանապարհների սպասարկումը: Փաշինյանի իշխանությունը շարունակ գլուխ է գովում կամ «փիարվում» է ասֆալտով, բայց թե փաստացի ինչպե՞ս են սպասարկվում այդ ճանապարհները, ինչպիսի՞ տեխնիկական հագեցվածություն ունեն սպասարկման ծառայությունները, մեծ հարց է, որի պատասխանը տվեց առաջին իսկ տեղացած ձյունը: 
Թե բա՝ «մերկասառույցի պատճառով», «600 մեքենա...», «ձմեռային անվադողե՜ր...»: 

Աղբյուր՝ Yerevan.today