Սերգեյ Բագրատյանը փորձում է արդարացնել ավազի ապօրինի արդյունահանումը․ «Հետք»

«Հետք»-ը գրել է․ «ԱԺ «Քաղաքացիական պայմանագիր» խմբակցության պատգամավոր Սերգեյ Բագրատյանը երեկ հայտարարեց, որ իր կնոջը պատկանող ընկերությունն ավազի ապօրինի արդյունահանում չի իրականացրել։ Ըստ պատգամավորի, Ռանչպար գյուղում հող են վարձակալել, որպեսզի այգի հիմնեն, սակայն, տեսնելով ավազը, որոշել են հողը մաքրել ավազից, իսկ վաճառված ավազից ստացած միջոցները պետք է ներդնեն այգի հիմնելու ծրագրում։ Իր բնորոշմամբ` թափոն համարվող ավազ տեղափոխելը հանքարդյունահանում չէ, ավելին` իրենք կարող էին մինչև 2 մետր խորությամբ ընդերքից նյութ հանել և տեղափոխել, որն օրինական է։ Այս պնդումները կարող էին ճիշտ լինել, եթե չլինեին դրանք հերքող մի շարք փաստեր։
Նոյեմբերի 15-ին հրապարակված հոդվածում ներկայացրել էինք մանրամասներ, թե ինչպես է պատգամավորի կնոջ ընկերությունն ավազի ապօրինի արդյունահանում իրականացնում Արարատի մարզի Ռանչպար գյուղում։
Մինչ հոդվածի հրապարակումը պարզաբանումներ ստանալու նպատակով դիմել էինք Սերգեյ Բագրատյանին։ Տեղեկանալով, որ պատգամավորն Իտալիայում կոնֆերանսի է մասնակցում, սպասեցինք, որպեսզի վերադառնա Հայաստան և պատասխանի մեր հարցերին։ Օրեր անց ԱԺ-ում հանդիպեցինք, սակայն հրապարակման համար պարզաբանում չստացանք։ Ոչ պաշտոնական զրույցից հետո նա խոստացավ, որ ավազի արդյունահանմանն առնչվող փաստաթղթերը կուղարկեն և առաջարկեց մեզ հետաքրքրող հարցերի շուրջ զրուցել ընկերութան տնօրինության հետ։ Մինչ հոդվածի հրապարակումը մենք չստացանք խոստացված փաստաթղթերը, ուստի հրապարակեցինք հոդվածը։ Այս մանրամասները չէինք գրի, եթե Սերգեյ Բագրատյանը պահեր ոչ հրապարակման նպատակով կայացած հանդիպման ընթացքում տրված խոստումը՝ ուղարկեր փաստաթղթերը։
Հոդվածի հրապարակումից հետոՍերգեյ Բագրատյանը մեզ 3 փաստաթուղթ է տրամադրել, որոնք վերաբերում են իր կնոջը պատկանող «Արարակ» ՍՊԸ-ի տնօրենի և Տարածքային կառավարման եւ ենթակառուցվածքների նախարարության «Հանրապետական երկրաբանական ֆոնդ» ՊՈԱԿ-ի և Շրջակա միջավայրի նախարարության հետ նամակագրություններին։ 2022 թ.-ի դեկտեմբերին Բագրատյանի կնոջ ՍՊԸ-ի տնօրենը դիմել է Շրջակա միջավայրի նախարարին՝ խնդրելով նշանակել փորձաքննություն վտանգավոր թափոնների օգտահանման լիցենզիա ստանալու համար։ 2023 թ.-ի ապրիլին ՇՄ նախարարի տեղակալ Տիգրան Գաբրիելյանը ՍՊԸ-ի տնօրենին գրավոր հայտնել է, որ այն թափոնները, որոնք ցանկանում են տեղափոխել, ներառված չեն «վտանգավոր թափոնների ցանկում»։ Այսինքն, ավազը չի համարվում վտանգավոր թափոն, որը տեղափոխելու համար պետք է թույլտվություն ստանային։ Երրորդ գրությունը, որ մեզ տրամադրել է պատգամավորը, «Հանրապետական երկրաբանական ֆոնդ» ՊՈԱԿ-ի տնօրենի նամակն է, որով ՍՊԸ-ի տնօրենին 2023 թ.-ի հունիսին հայտնում են, որ Ռանչպար գյուղի այդ տարածքում ընդերքօգտագործման իրավունք չկա, իսկ տարածքը օգտակար հանածոների հանքավայրերի պետական կադաստրում որպես հանքավայր չի հաշվառվում։ Այս նամակն էլ ստացվել է այն ժամանակ, երբ տարածքից մի քանի ամիս արդեն ավազ են արդյունահանել։
Վերը շարադրված փաստերը, Սերգեյ Բագրատյանի հայտարարությունները և մեր արձանագրած՝ ավազի արդյունահանման փաստերը համադրելով՝ եզրահանգում ենք, որ նամակագրություններով փորձել են քողարկել ավազի ապօրինի արդյունահանումը։
Պատգամավորի կնոջ ՍՊԸ-ն ավազի արդյունահանման իր գործունեությունը գնահատել է «թափոնների տեղափոխում», դրա վերաբերյալ նամակներ կազմել, այնինչ «Թափոնների մասին» ՀՀ օրենքը տարածվում է արտադրության և սպառման ընթացքում գոյացած թափոնների գործածության վրա։ Ըստ օրենքի, նման թափոններ են համարվում արտադրության կամ սպառման ընթացքում գոյացած հումքի, նյութերի, արգասիքների, այլ արտադրանքի կամ մթերքի մնացորդները, ինչպես նաև՝ ապրանքները (արտադրանք), որոնք կորցրել են իրենց սկզբնական սպառողական հատկությունները։
Բացի այդ, Սերգեյ Բագրատյանը հայտարարել է, որ ընդերքից մինչև 2 մետր սեփական կարիքների համար կարելի է նյութեր հանել, տնօրինել։ «Ընդերքի մասին» օրենսգրքի 48-րդ հոդվածը սահմանում է՝ «Իրավաբանական անձինք և քաղաքացիները, առանց ընդերքօգտագործման իրավունքի ձևավորման, իրենց սեփական հողամասերի սահմաններում շահույթ ստանալու նպատակ չհետապնդող, տնտեսական և կենցաղային սեփական կարիքների բավարարման նպատակով կարող են կատարել պետական հաշվեկշռում չհաշվառված ոչ մետաղական օգտակար հանածոների արդյունահանում` մինչև 2 մետր խորությամբ։ Օրենսգիրքը հստակ սահմանել է, որ դա շահույթ հետապնդելու նպատակով չպետք է լինի, մինչդեռ Սերգեյ Բագրատյանը հայտարարել է, որ ավազը վաճառել են, հարկեր են վճարել։ Այսինքն՝ նաև շահույթ են ստացել։
Այս ամենից հետո ավելորդ է նույնիսկ քննարկել այն հարցը, թե ավազի հանքի վրա ինտենսիվ ի՞նչ այգի պետք է հիմնեին, ի՞նչ ծառեր պետք է տնկեին, աճեցնեին։
Ի դեպ, ավազի ապօրինի արդյունահանման մասին մեր հրապարակումից հետո Սերգեյ Բագրատյանի կինը՝ Նաիրա Հակոբյանը, «Արարակ» ՍՊԸ-ում ունեցած իր 100 % բաժնեմասը փոխանցել է այլ անձի՝ Վրեժ Եղոյանին, որը Սերգեյ Բագրատյանի բիզնես գործընկերներից է»։