Լոնդոնի «սրտում» բացվեց Հայաստանի դեսպանության՝ մեր գրպաններին 16 միլիոն ֆունտ ստերլինգ «նստած» շենքը (տեսանյութ)

Փաշինյանի ԱԳՆ կայքից տեղեկանում ենք, որ Լոնդոնում բացվել է Հայաստանի դեսպանատան նոր շենքը, որի համար, հիշեցնենք, փաշինյանական կառավարույթունը երկրի բյուջեից շուրջ 16 միլիոն ֆունտ ստերլինգ էր «ցնծացել»: Նրանց երևի թվում է,, թե արտաքին քաղաքականության սնանկությունը կարելի է փոխհատուցել նման շռայլ ծախսերով...
Ինչ վերաբերում է պաշտոնական հանգամանքներին, ապա Փաշինյանի ԱԳ նախարար Արարատ Միրզոյանը Միացյալ Թագավորություն պաշտոնական այցի շրջանակներում մասնակցել է ՀՀ դեսպանության նոր շենքի պաշտոնական բացման արարողությունը, որին ՄԹ կառավարության անունից մասնակցել է գործարարության և առևտրի պետնախարար Թիմըթի Մինտոն։ 
Հայաստանի ԱԳ նախարար Արարատ Միրզոյանը և Միացյալ Թագավորության գործարարության և առևտրի պետնախարար Թիմըթի Մինտոն հանդես են եկել ողջույնի և շնորհավորական խոսքով։ Միջոցառմանը ներկա են գտնվել նաև Արքունիքի ներկայացուցիչներ, այլ պաշտոնյաներ: 
Միրզոյանն իր ճառի ընթացքում մասնավորապես նշել է. «...Այս դեսպանությունը հանդիսանում է բարեկամության և համագործակցության փարոս մեր ժողովուրդների միջև, և այս շենքը կամուրջ է, որը կապում է ոչ միայն մեր կառավարություններին, այլև մեր տնտեսությունները, մեր մշակույթները և մեր ժողովուրդներին: Այսօր ժապավենը կտրելիս մենք ոչ միայն շենքի բացումն ենք ազդարարում, այլ նոր հիմք ենք դնում մեր հարաբերությունների խորացման համար։ Մենք վերահաստատում ենք մեր հանձնառությունը՝ խորացնելու մեր քաղաքական երկխոսությունը, մեր տնտեսական և մշակութային կապերը: Բայց նաև հետաքրքիր զուգադիպությամբ բացման այս արարողությունից անմիջապես հետո մենք պատրաստվում ենք մեր հարաբերությունների նոր մակարդակի՝ Հայաստանի Հանրապետության և Միացյալ Թագավորության միջև ռազմավարական երկխոսության մեկնարկին»:
Դե, իհարկե, Մեծ Բրիտանիան այնքան ջերմ զգացմունքներ է տածում հայերի հանդեպ, որ անհամբեր սպասում էր, թե իր գործընկեր թուրքերն ու ադրբեջանցիները երբ պիտի բնաջնջեն Արցախի հայերին, որպեսզի արագորեն այնտեղ ներդրումներ աներ, օրինակ, ոսկու հանքաքարի արդյունահանման համար, դե՝ «Բրիթիշ փեթրոլիումի» մասին նույնիսկ ավելորդ է խոսել: 
Իսկ Արարատ Միրզոյանը հայտարարում է, որ ուրեխ է «կիսել այս պատմական պահը» (տեսնես ո՞վ է եղել նրա հայերենի ուսուցիչը: Հայերենում պահերը, լինեն դրանք պատմական, թե շարքային, չեն «կիսում», հա ու հանդիսանալն էլ ռուսաբանություն է)::Մի խոսքով, Միրզոյանն ուրախ էր և շնորհակալ՝ «պատմական պահի մի մասնիկը լինելու համար»:
Ինչպիսի՜ պերճախոսույթուն: 
«Լոնդոնի սրտում գտնվող այս շենքում ՀՀ դեսպանության տեղակայումն ի ցույց է դնում մեր պատրաստակամությունը խորացնելու և նոր թափ հաղորդելու հայ-բրիտանական հարաբերություններին` ի շահ մեր երկու ժողովուրդների»,-ասել է Արարատ Միրզոյանը: Հետաքրքիր է, իսկ Լոնդոնի ո՞ր «օրգանում» է գտնվում, օրինակ, ադրբեջանական դեսպանատունը՝ «ստամոքսո՞ւմ»: Իսկ ռուսական դեսպանատունն էլ երևի Լոնդոնի «երիկամներո՞ւմ» է: 
Մի խոսքով, չմեռանք, Լոնդոնում լավ թանկանոց դեսպանատուն ունեցանք: Արտաքին քաղաքականություն չունենք, բայց դե ո՞վ է նման մանրուքների վրա նայում: 
Լուսանկարն ու տեսանյութը՝ ԱԳՆ կայքից
Zham.am