Քաղաքացիների մոտ 80 տոկոսը չի վստահում քաղաքական որևէ ուժի. GALLUP International Association (տեսանյութ)

Հայաստանում «GALLUP International Association»-ի Հայաստանում լիիրավ անդամ «Էմ Փի ՋԻ» ընկերության իրականացրած հարցման մասնակիցների մեծամասնությունը դեմ է երկրում խորհրդարանական նոր ընտրությունների անցկացմանը: Լրագրողներին այս մասին հայտնեց ընկերության տնօրեն Արամ Նավասարդյանը:
«Ընդհանրապես անհրաժեշտ չէ՝ նշել է 33.7,  և ավելի շուտ անհրաժեշտ չէ՝ ասել է հարցվածների 14.1 տոկոսը»,- ասաց նա:
Նրա խոսքով՝ խորհրդարանական նոր ընտրությունների անցկացմանը միանշանակ կողմ է արտահայտվել հարցվածների 23.3 տոկոսը, դրանք ավելի շուտ անհրաժեշտ է համարել 18.1 տոկոսը: Իսկ ընտրություններին մեծամասնության դեմ լինելն, ըստ Նավասարդյանի, բացատրվում է նրանով, որ մեր հայրենակիցների մեծամասնությունը չի վստահում Հայաստանում ներկայացված քաղաքական որևէ ուժի:
«Եթե առաջիկա կիրակի օրը լինեին խորհրդարանական ընտրություններ՝ ո՞ր կուսակցության կամ դաշինքի օգտին կքվեարկեիք» հարցին ի պատասխան՝ քաղաքացիների 15.6 տոկոսը նշել է «ՔՊ»,
«Հայաստան» դաշինքը նշել է հարցվածների 4.7 տոկոսը,
«Հանրային ձայն»-ին՝ 2.5 տոկոսը,
«ԲՀԿ»-ին՝ 2.1 տոկոսը,
իսկ «Պատիվ ունեմ» դաշինքին՝ 1.2 տոկոսը»,- մանրամասնեց Արամ Նավասարդյանը:
Հատկանշական է, որ ըստ հարցման, 13,8 տոկոսը հրաժարվել, իսկ 30,1 տոկոսը դժվարացել է պահասխանել: Էլ ավելի հատկանշական է, որ 23,5 տոկոսը նշել է, թե չի մասնակցի ընտրություններին: 
Ավելին, ինչպես եք գնահատում ՀՀ նախագահի, ԱԺ-ի, կառավարության ու վարչապետի գործունեությունը հարցին՝ հարցվածների 34 %-ը հավանություն է տվել վարչապետի գործունեությանը, 52,6%-ը նշել է, որ հավանություն չի տալիս։
29,1%-ը հավանություն է տվել կառավարության գործունեությանը, 57,7 %-ը նշել է, որ հավանություն չի տալիս։
ԱԺ-ի գործուենությանը հավանություն է տվել 22,2%-ը, իսկ 64%-ը՝ հավանություն չի տվել։
ՀՀ նախագահի գործունեությանը հավանություն է տվել հարցվածների 23%-ը, հավանություն չի տվել  53,7%-ը։

Արցախում Ադրբեջանի կողմից իրականացված ցեղասպանական գործողությունների հետևանքով արցախահայերի բռնի տեղահանությամբ Արցախի էջը փակված չէ ՀՀ տարածքում հարցված քաղաքացիների ավելի քան կեսի համար, հիմնվելով հարցման արդյունքների վրա, ասել է Արամ Նավասարդյանը:
Հարցման մասնակիցները պատասխանել են հարցին, թե Արցախում տեղի ունեցած վերջին իրադարձություններից ու ավելի քան 100.000 արցախցի մեր հայրենակիցների բռնի տեղահանումից հետո ինչպես պետք է վարվի Հայաստանի Հանրապետությունը:
46.6 տոկոսը նշել է, որ Հայաստանի Հանրապետությունը պետք է պայքարի անկախ Արցախի Հանրապետության համար, որից հետո արցախահայությունը պետք է վերադառնա իրենց տները: 40 տոկոսը նշել է, որ ՀՀ-ն պետք է ինտեգրի արցախցիներին՝ Հայաստանում, և հոգ տանի սոցիալական ու այլ իրավունքների համար:
Հարցման արդյունքներով՝ միայն 9.2 տոկոսն է տեսակետ հայտնել, որ արցախցիները պետք է վերադառնան Արցախ, այնտեղ ստանան անհրաժեշտ անվտանգային ու սոցիալական հարցերի լուծում ու ապրեն Ադրբեջանի կազմում՝ փոքրամասնության կամ այլ կարգավիճակով:
Աղբյուրներ՝ 168.am, Tert.am