.Ի՞նչ «երրորդ երկրի» մասին է խոսքը

Փաշինյանի ԱԳՆ խոսնակը մեկնաբանել է ՌԴ ԱԳՆ պաշտոնական ներկայացուցչի հայտարարությունը: 
Հայաստանի Հանրապետության կառավարությունը բոլորովին վերջերս հրապարակել է «Խաղաղության խաչմերուկ» նախագիծը, որի հիմնարար սկզբունքներից ակնհայտ է դառնում, որ տարածաշրջանային կոմունիկացիաների բացման դեպքում Հայաստանի Հանրապետությունն իր տարածքում իր պետական ինստիտուտների միջոցով պետք է իրականացնի սահմանային, մաքսային հսկողություն: 
Բացի դա, ՀՀ ԱԱԾ-ում վերջերս ստեղծվել է հատուկ ստորաբաժանում, որի խնդիրը տարածաշրջանային կոմունիկացիաների բացման դեպքում այդ կոմունիկացիաների ինչպես նաև դրանցով ապրանքների, բեռների, տրանսպորտային միջոցների և մարդկանց անցման անվտանգության ապահովումն է:
Հայաստանի Հանրապետությունը երբևէ, որևէ փաստաթղթով չի համաձայնվել իր սուվերենության որևէ սահմանափակման, և իր սուվերեն տարածքի որևէ հատվածի վրա երրորդ երկրի վերահսկողություն հաստատվել չի կարող:
Սա՝ պաշտոնական հատվածը: 
Նախ, հիշեցնենք, թե ինչի մասին է խոսքը: Բանն այն է, որ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ եռակողմ պայմանավորվածությունների համապատասխան՝ տրանսպորտային հաղորդակցության վերահսկումը Ադրբեջանի և Նախիջևանի ԻՀ միջեւ իրականացնելու են Ռուսաստանի ԱԴԾ սահմանապահ ծառայության մարմինները:
Մի քանի դիտարկում էլ մեր կողմից: Պարզ է, որ Ռուսաստանն ակնարկում է 2020-ի նոյեմբերի 9-ի հայտարարությունը, որից կարելի է ասել՝ ոչինչ չի մնացել: 
Բայծ մեզ ավելի շատ հետաքրքրեց Փաշինյանի ԱԳՆ խոսնակի պաշտոնական մեկնաբանության մեջ գործածված հետևյալ արտահայտությունը, ըստ որի՝ Հայաստանը երբևէ որևէ փաստաթղթով չի համաձայնվել, որ «իր սուվերեն տարածքի որևէ հատվածի վրա երրորդ երկրի վերահսկողություն հաստատվել չի կարող»: 
Կներեք, ի՞նչ «երրորդ երկիր»: Եթե խոսքը ՀՀ սուվերեն տարածքի և այն վերահսկելու մասին է, ի՞նչ «երրորդ երկիր» կարող է լինել: Այսինքն, արդեն մի հատ «երկրորդ երկիր» կա՞, որ դրան «երրորդ երկիր» է ավելանում: Փաշինյանական իշխանության դեպքում, կարծում ենք, կարելի է գրեթե անսխալ կռահել, թե ո՛րն է այդ «երկրորդ երկիրը», թերևս Թուրքիա՞ն է, իսկ միգուցե հենց Ադրբեջա՞նը: 
Ի՞նչ «երրորդ երկիր», էլի: 
Zham.am