Այ, ջրափոս եմ ասել, է՜...

Անհայտ է՝ Գյումրին նիկոլական ֆանտազիաներով կդառնա՞ «չոր նավահանգիստ», բայց տեղի իշխանությունները որոշ քայլեր են անում, որ Գյումրին դառնա նավահանգիստ, այն էլ ոչ թե՝ «չոր» այլ՝ ամենաիսկական, թա՛ց նավահանգիստ: Համենայն դեպս, Գյումրիում ձևավորել են այնպիսի ջրափոսեր, որի մեջ հայտնվելուց հետո կարելի է դուրս ելնել միայն... փրկարարների օգնությամբ: 
Ահավասիկ, փրկարար ծառայության ֆեյսբուքյան էջից տեղեկանում ենք. «Նոյեմբերի 8-ին, ժամը 09։18-ին Շիրակի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Գյումրի քաղաքի Չարենցի փողոցում ավտոմեքենան արգելափակվել է փոսում. դուրս բերելու համար անհրաժեշտ է փրկարարների օգնությունը:
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:
Փրկարարները հատուկ տեխնիկայի օգնությամբ արգելափակումից դուրս են բերել «VAZ» մակնիշի ավտոմեքենան (վարորդ՝ Ա․ Մ․, ծնված 1980 թ.)»:
Ի դեպ, գյումրվա փրկարարներին և փրկարար ծառայության ֆեյսբուքյան էջավարին բարեկամաբար հուշենք, որ ջրափոսից հանված մեքենայի մակնիշը ՎԱԶ չի՛: Այդ մեքենան ԳԱԶ մակնիշի է, լուսանկարից դատելով՝ ԳԱԶ-31: 
Լուսանկարները՝ հիշյալ ֆեյսբուքյան էջից: Մենք հավելել ենք միայն Գյումրու քաղաքապետ Վարդգես Սամսոնյանի և Շիրակի մարզպետ Մուշեղ Մուրադյանի պատկերները, որպեսզի ջրափոսը շատ անտեր չթվա: Վայելեք ուտոպիստական «չոր նավահանգստի» էքզիստենցիալ ջրափոսի պատկերը: Սա ջրափոս չի, սա Գյումրու քաղաքային ու նաև Շիրակի մարզային իշխանությունների հանրաշահ գործունեության ճլփացող հուշարձան է: Քաղաքի ու մարզի ներկայիս ղեկավարներն, իհարկե, եթե ցանկանում են պահպանել պաշտոնները, պարտավոր են ասել, որ ջրափոսն այդ մնացել է «նախկիններից»: Հ-բը:

Zham.am