Հանկարծ չքաղաքականացնե՜ք...

Անընդունելի է արցախցիների գործոնը ներքաղաքական խմորումներում օգտագործելը:
Ինչպես հաղորդում է Tert.am-ը, այս մասին ասված է «Արցախի պետականության պահպանման հանձնախմբի» տարածած հաղորդագրության մեջ:
«Սույն թվականի նոյեմբերի 1-ին տեղի ունեցավ «Արցախի պետականության պահպանման հանձնախմբի» կողմից հրավիրված փակ հանդիպում Արցախի պետականության պահպանման և հետագա քայլերը ԱՀ Նախագահի և ԱՀ Ազգային Ժողովի պատգամավորների հետ համատեղ քննարկելու նպատակով։
Հանդիպումը փակ էր և քննարկման բովանդակությունը չհանրայնացվեց, այնուամենայնիվ այն լայն արձագանք ստացավ, ինչպես հանրության, այնպես էլ քաղաքական տարբեր դերակատարների շրջանում։
Տարատեսակ շահարկումներին տեղ չտալով նշենք, որ հանձնախումբն այս պահին շարունակում է ակտիվ աշխատել և հանդիպումներ ունենալ ելնելով ավելի վաղ սահմանած իր նպատակից։
Այս գործընթացը չի կարող լինել ներքաղաքական որևէ շահարկման առարկա, ավելին մեր կողմից անընդունելի է ցանկացած միտում, որն ուղղված կլինի Արցախի մեր հայրենակիցների գործոնը ներքաղաքական տարաբնույթ խմորումներում օգտագործելուն։
Այս պահին ընթացող աշխատանքների և հանդիպումների արդյունքներն առաջիկայում կներկայացվեն հանրությանը»,- ասված է հայտարարության մեջ։
---
Մեր կողմից նկատենք, որ սա արդեն հայրենի տրականության մեջ յուրօրինակ «բրենդ» է դարձել: Նկատի ունենք այն, որ մարդիկ կամ մարդկանց տարբեր խմբեր մնում, մնում, մեկ էլ ելնում ու ամենաքաղաքական հարցերի վերաբերյալ աղմկոտ հայտարարություն են անում, թե՝ «մի քաղաքականացրե՜ք...»: Հիմա էլ այս հայտարարության հեղինակներինն է, թե՝ իրենք անընդունելի են համարում ցանկացած միտում, որն ուղղված կլինի Արցախի հայրենակիցների գործոնը... ներքաղաքական խմորումներում օգտագործելուն: 
Այսի՞նքն: Կոնկրետ ո՞ւմ եք բան ասում: Ասում եք՝ կոնկրետ արտահայտվեք, ասել, օրինակ, Էդմոն Մարուքյանը այսպես ու այսպես: 
Ինչպե՞ս են, էլի հայտարարության հեղինակները պատկերացնում, որ Արցախի հետ կատարվածը կամ արցախցիների հարցերը խմորումների տեղիք չտան: Մյուս կողմից, կներեք, էլի, ձե՞զ են հարցնելու ամենատարբեր քաղաքական ուժեր, շրջանակներ, գործիչներ, ձեզանի՞ց են թույլտվություն վերցնելու, թե ինչ հարց արծարծեն կամ չարծարծեն: 
Քիչ է մնում ասեն, թե՝ մի՛ քաղաքականացրեք... քաղաքականությունը: