Փաշինյանի օրոք Հայաստանի և Ռուսաստանի միջև հարաբերությունների որևէ բարելավում տեղի չի ունենա. Իգոր Նիկուլին (տեսանյութ)

Ռուս քաղաքագետ և ռազմական փորձագետ Իգոր Նիկուլինը Alpha News-ի հետ զրույցում մեկնաբանել է հայ-ռուսական հարաբերություններում առկա իրավիճակը:
«Նրանք այսօր փակուղի են շարժվում։ Նիկոլ Փաշինյանի արևմտամետ, կոմպրադոր խմբավորման իշխանության գալը ոչ միայն հանգեցրել է Արցախի հանձնմանը, այլև ընդհանրապես կարող է հարցականի տակ դնել հայկական պետության գոյությունը։ Որովհետև նախկին ԱՊՀ բոլոր երկրներում, որտեղ իշխանության էին գալիս գլոբալիստների, բրիտանացիների, ամերիկացիների այդ դրածոները և այլն, ընդհանուր առմամբ, ոչ մի ձեռքբերում չի եղել։ Եղել են միայն կորուստներ։
Այնուամենայնիվ, Ռուսաստանն իր գիրկն է ընդունել, այսպես անվանենք, 200 ժողովուրդ և պահպանել է նրանց բոլորին՝ ի տարբերություն անգլոսաքսերի, որոնք ոչնչացրել են հարյուրավոր ժողովուրդներ և տասնյակ միլիոնավոր մարդկանց, որպեսզի թալանեն այն երկրների հարստությունը, որոնք նրանք իբր իրենց խնամակալության տակ են վերցրել», — հայտարարել է Նիկուլինը։
Փորձագետը Եվրոպայի հետ մերձեցման գնալու Հայաստանի ձգտման մեջ ոչ բարեկամական դրսևորումներ է տեսնում և այդ գործողությունները միանշանակ բացասական է գնահատում։
«Դե, եթե Հայաստանն ակտիվորեն գնում է այն երկրների հետևից, որոնք, ըստ էության, պատերազմ են հայտարարել Ռուսաստանին, այսինքն՝ հավաքական Արևմուտքի երկրների հետևից, ապա, իհարկե, Ռուսաստանին նման բան դուր գալ չի կարող։ Իմ կարծիքով՝ այս ամենը բավականին տրամաբանական է: Կարծում եմ, որ այստեղ, կարծես, ոչ մի արտառոց բան չկա, սովորական աշխարհաքաղաքականություն: Ով մեզ հետ չէ, մեր դեմ է», — ընդգծել է Նիկուլինը:
Alpha News-ի զրուցակիցը կարծում է, որ Հայաստանն իր գիրկն ընդունելու հարցում Արևմուտքի բարեհաճության համար Արցախը հանձնել չարժեր:
«Հայաստանն այս հարցում իրեն շատ անխոհեմ է պահում, որովհետև ես կարծում եմ, որ, ասենք, Արցախը Հայաստանի համար մոտավորապես Կոսովոյի նման է Սերբիայի համար։ Նրանք այս հողի վրա ապրել են հազար տարի, այնտեղ են գտնվում նրանց սրբավայրերից շատերը, և ահա այսպես վերցնել, հանձնել հենց այնպես իրենց հողը հանուն երբևէ Եվրամիություն մտնելու առասպելական հնարավորության, դա, իմ կարծիքով, միանգամայն հակաարդյունավետ է։ Նույնիսկ Թուրքիան արդեն 70 տարի հերթի մեջ է», — նկատել էքաղաքագետը։
Միևնույն ժամանակ, այն տեղ է թողնում Հայաստանի և Ռուսաստանի միջև բարեկամական հարաբերությունների վերսկսմանը, բայց մի պայմանով։
«Եթե իշխանությունը փոխվի, ամեն ինչ հնարավոր է վերադարձնել։ Բայց առայժմ իմ կանխատեսումը հոռետեսական է։ Ներկայիս իշխանության օրոք, կարծում եմ, Հայաստանի և Ռուսաստանի միջև հարաբերությունների ոչ մի բարելավում տեղի չի ունենա», — ամփոփել է Նիկուլինը։