«Ցուցակագրեք էն բ․․․ թուլեքի ցանկը, որոնց սատկացնելու ենք նիկոլի սիկ․․․ հետո». Ո՞րն է Արագած Ախոյանի կալանավորման հիմքը

Ինչպես հայտնի է, կալանավորվել է ԱԺ նախկին պատգամավոր Արագած Ախոյանը: News.am-ը հրապարակել է Փաշինյանի քննչական կոմիտեի տարածած հաղորդագրությունը: Ըստ այնմ. 2023 թվականի հուլիսի 31-ին ՀՀ քննչական կոմիտեի ԵՔՔՎ Կենտրոն և Նորք-Մարաշ վարչական շրջանների քննչական երրորդ բաժնում առերևույթ հանցանքի մասին վկայող տվյալների հիման վրա ՀՀ քրեական օրենսգրքի 330-րդ հոդվածի 2-րդ մասի 3-րդ կետի հատկանիշներով նախաձեռնված քրեական վարույթի նախաքննությամբ փաստական տվյալներ են ստացվել այն մասին, որ Ա․ Ա․-ն (ԱԺ նախկին պատգամավոր Արագած Ախոյան) 2023 թվականի հունիսի 8-ին, տեղեկատվական և հաղորդակցական տեխնոլոգիաների օգտագործմամբ, հանրության լայն շրջանակների համար հանրամատչելի «Facebook» սոցիալական կայքի իր «Aragats Akhoyan» անվամբ էջում, անձանց խմբի նկատմամբ քաղաքական հայացքներով պայմանավորված, հնչեցրել է բռնություն գործադրելու հրապարակային կոչեր։ Մասնավորապես՝ նա կատարել է հետևյալ հրապարակումը՝ «Ցուցակագրեք էն բ․․․ թուլեքի ցանկը, որոնց սատկացնելու ենք նիկոլի սիկ․․․ հետո», որին արձագանքել են «Facebook» սոցիալական կայքի բազմաթիվ օգտատերեր։ 
Ձեռք բերված փաստերի հիման վրա 2023 թ․ նոյեմբերի 3-ին Ա․ Ա․-ի նկատմամբ ՀՀ քրեական օրենսգրքի 330-րդ հոդվածի 2-րդ մասի 3-րդ կետով հանրային քրեական հետապնդում հարուցելու մասին միջնորդություն է ներկայացվել հսկող դատախազին, որը բավարարվել է։
Որոշում է կայացվել ազատության մեջ գտնվող մեղադրյալ Ա․ Ա․-ին դատարան ներկայացնելու նպատակով ձերբակալելու մասին։ Նոյեմբերի 6-ին նա ձերբակալվել է, և նրան ներկայացվել է մեղադրանք։
Նույն օրը միջնորդություն է ներկայացվել Երևան քաղաքի առաջին ատյանի ընդհանուր իրավասության քրեական դատարան՝ նրա նկատմամբ կալանքը որպես խափանման միջոց կիրառելու վերաբերյալ, որը դատարանի կողմից բավարարվել է մասնակի` մեկ ամիս ժամկետով»,- ասված է հաղորդագրության մեջ»։
---
Մեր կողմից նկատենք մեկ-երկու ուշագրավ հանգամանք. 
Առաջինը՝ Փաշինյանի ՔԿ-ում, ըստ երևույթին ունեն «բ... թուլեքի» ցանկ, կոնկրետ անուն-ազգանուններով, հակառակ դեպքում մեղադրանք չէին ներկայացնի, որ գրառումն ուղղված է անձանց կոնկրե՛տ խմբի դեմ: 
Սա, ինչպես «դավաճանների» դեպքում է: Հենց որևէ մեկը գործածում է այդ բառը, փաշինյանական ռեպրեսիվ օրգանները դա միանգամից վերագրում են կոնկրետ փաշինյանական իշխանության ներկայացուցիչներին ու նրանց դեմ ուղղված: Սա, ինչ խոսք, բնութագրական է: 
Երկրորդը՝ գրառումն, ինչպես նշվաց, արվել է հունիսի 8-ին, քրեական վարույթ նախաձեռնվել է դրանից գրեթե 2 ամիս անց (!!!): Իսկ կալանավորումն իրականացվել է ամբողջ 5 (հինգ) ամիս անց: Երկուսից մեկը՝ կա՛մ փաշինյանական ռեպրեսիվ օրգանները սարսափելի «գերօպերատիվ» են գործում, կա՛մ  այստեղ մեկ այլ խնդիր կա: Չի կարելի բացառել, որ այդ ընթացքում իշխանական շրջանակները փորձել են կոնտակի մեջ մտնել Արագած Ախոյանի հետ, բայց երևի դրանից ոչինչ չի ստացվել, որից հետո արդեն դիմել են «չոր բռնաճնշումների» տարբերակին: