Փաշինյանական «ժողովրդավարությունը» հասավ իր խայտառակության ցածրունքին. հետապնդում է սկսվել իրավապաշտպան Ավետիք Իշխանյանի նկատմամբ

Այսօր հայտնի դարձավ, որ քրեական պատրվակներով քաղաքական հետապնդում է սկսվել իրավապաշտպան Ավետիք Իշխանյանի դեմ: Ավետիք Իշխանյանի ֆեյսբուքյան գրառումից տեղեկանում ենք, որ նրա նկատմամբ քրեական գործ է հարուցվել՝ «բռնության կոչի» հոդվածով: 
Ավետիք Իշխանյանը գրել է. «ՎԵՐՋԱՊԵՍ
Քիչ առաջ, ինձ զանգահարեց ոմն քննիչ և հաղորդեց, որ ինձ մեղադրանք է առաջադրվել քր․ օրենքի․ «բռնության կոչ», 330 հոդվածով։ Մեղադրանքի հիմք է հանդիսացել, ս․թ․ սեպտեմբերի 19-ի ներքո բերված գրառումը։ Բացարձակապես չեմ զղջում գրառման համար, նույնիսկ համարում են այն ավելի քան մեղմ է։Պետք է շատ ավելի վճռական, բիրտ խոսել և գործել դավաճանների դեմ։
Այսօր ամոթ է, եթե քեզ մեղադրանք չեն առաջադրել, ուրեմն դու հարմարվել ես ու հաշտվել հայրենիքի կորստի հետ։ Ստալինյան շրջանում գնդակահարեցին երկու պապերիս ու մի տատիս, բրեժնևյան շրջանում ԿԳԲ էին տանում ու հարցաքննում հորս։ Վերջապես, անկախ կոչվող, իրականում՝ ողորմելի Հայաստանում, գարշապետի ցուցումով, ինձ էլ մեղադրանք առաջադրվեց»։
Այնուհետև Ավետիք Իշխանյանը մեջբերել է խնդրո առարկա իր գրառումը ևս. «ՄԱ՛Հ ԴԱՎԱՃԱՆՆԵՐԻՆ
Չի բացառվում, որ ինչպես 2020թ․, այնպես էլ այսօր սկսված պատերազմը պայմանավորված էր։ Այն ինչ մինչև վերջ չհաջողվեց 2020թ․, այն է՝ Արցախի ամբողջական հանձնումը, փորձ է կատարվում իրականացնել այժմ։ Սրան նախորդեցին վարչապետ կոչեցյալ դավաճանի հակառուսական հայտարարությունները,ԵՄ կոչվող դիտորդները, հայ-ամերիկյան զորավարժությունները, որոնք հիանալի հող ստեղծեցին ադրբեջանական հարձակման համար։
Ադրբեջանը շտապում է, քանի որ իր դրածո դավաճանի աթոռը երերում է։ Միևնույնն է, ի հեճուկս դավաճանների, Արցախը մնալու է կանգուն: Մա՛հ դավաճաններին»։
Եղելությանն արձագանքել է նաև իրավապաշտպան Ռուբեն Մելիքյանը: Նա գրել է. «Իրավապաշտպան Ավետիք Իշխանյանի նկատմամբ քրեական հետապնդում է հարուցվել ներքևում նշված գրառման համար։ 
Ամոթ։ Հազար ամոթ։
ՀԳ. Շատ տրամաբանական է, որ ռեժիմը թիրախավորել է Հայաստանի թիվ մեկ իրավապաշտպանին։ Դեպի բռնապետություն գահավիժող երկրում դա պարզապես անխուսափելի էր»:
։--
Ի դեպ, չի կարելի բացառել, որ Ավետիք Իշխանյանի դեմ այս հետապնդումն սկսված լինի նույնիսկ Արևմտյան երկրների դեսպանների հրահրմամբ, քանի որ դա տեղի ունեցավ անմիջապես այն բանից հետո, երբ Ավետիք Իշխանյանը հրապարակայնորեն դիմեց Հայաստանում հավատարմագրված «ժողովրդավարական» երկրների դեսպաններին՝ մերկացնելով նրանց ողորմելի լռության պատճառներն ու ամփոփ ներկայացնելով փաշինյանական ռեժիմի կողմից մարդու իրավունքների համատարած խախտումների՝ մեկը մյուսից խայտառակ փաստերը: 
Արձագանքը եղավ այս նորությունը: Ի վերջո, Ավետիք Իշխանյանը հիշյալ գրառումն արել էր ավելի քան մեկուկես ամիս առաջ, այդ դեպքում ինչո՞ւ հենց միայն նրա՝ դեսպանատներին ուղղված հայտարարությունից հետո ռեժիմը հետապնդում սկսեց այդ գրառման պատրվակով: 
Փաստորեն, մինչ ԱՄՆ-ը, Եվրամիությունը, մյուս, իբրև թե՝ ժողովրդավարության ջատագով արևմտյան տերությունները ամեն գնով պաշտպանում են Նիկոլ Փաշինյանի բռնապետական, ոստիկանական ռեժիմը, այն շարունակում է մոլեգնել նոր թափով: Ավելի ճիշտ՝ ամենաիսկական մարդաորսի ելած փաշինյանական ոստիկանապետությունը մոլեգնում է, քանի որ Արևմուտքը կուրորեն աջակցում է իրենց «սրտի բռնապետին»:  Իրավիճակի հավելյալ զավեշտն այն է, որ Արևմուտքը փաշինյանական ռեժիմը համարում է ժողովրդավարական: 
Zham.am